Padayon ang kinawatay
Kon makasugat ka og kongresista nga minghoy og dagway, posibleng usa siya sa 25 nga nibotar og “no” sa impeachment ni Bise Presidente Sara Duterte. Nagsugod na ang administrasyon ni Presidente Ferdinand Marcos Jr. sa pagpaila nila nga dakong sayop ang ilang gihimo.
Kasaligang tinubdan nitug-an nga karon pang buwana nagsugod ang pagpagawas sa mga pundo sa mga proyekto sa nagkalainlaing mga distrito sa tibuok nasud. Ug ang 257 ka kongresista nga ni-impeach ni VP Sara ra ang nakadawat og notisya sa Department of Budget and Management (DBM) nga sugdan na pagpatuman ang ilang mga proyekto.
* * *
Kon sakto ang kasayuran, 10 ka kongresista sa Sugbo ug usa sa Bohol gipasaligan nga premyohan ang ilang pagsunod sa liderato sa House of Representatives sa pag-impeach ni VP Sara.
Upat ka kongresista sa Sugbo ug duha sa Bohol ang gipaabot nga magpuasa: Silang Cutie del Mar sa Cebu City North, Karen Flores-Garcia sa 3rd District, Sun Shimura sa 4th District, Girlie Veloso sa Malasakit@Bayanihan Partylist, Maria Vanessa Aumentado sa Bohol 2nd District, ug Kristine Alexie Besas-Tutor sa Bohol 3rd District.
* * *
Pero samang kasaligang tinubdan nipasabot nga dili maapil sa silot ang katawhan, mapatuman gihapon ang mga proyekto, gawas lang sa bag-o nga flood control projects (nga gipulihan sa farm to market roads), sa mga distrito sa mga kongresista nga nipabor ni VP Sara.
Dili na hinuon madawat sa 25 ka mga kongresista ang ilang naandan nga mga komisyon sa mga proyekto. Ang mokobra mao ang mga opisyal sa House nga gitudlo nga mga “caretaker” sa ilang mga proyekto.
* * *
Salawayon ang gihimo ni House Speaker Bojie Dy nga pagpabor sa mga kongresista nga pro-Sara ug pagsilot sa mga anti-Sara. Dako diayng bakak ang pasalig nga gawasnon ang mga kongresista sa pag-umol sa ilang baruganan sa botasyon sa impeachment ni VP Sara sa ikaduhang sunudsunod nga tuig.
Labawng dakong bakak ang patuo ni Marcos Jr. nga wala manginlabot ang Malakanyang. Kay eksklusibong gahom sa Kongreso ang impeachment process. Kinadak-ang bakak ang pasalig nga hunungon nang grabeng kinawatay sa mga proyekto. Kay gawas nga pila pa lang ka dagkong isda ang napriso, padayong nabuhong sa kickback ang iyang mga alyado.
* * *
- Latest
