Pabor ko sa sugyot

Nindot ning sugyot sa usa ka retired justice sa Supreme Court nga ang “Power of Impeachment” tangtangon gikan sa Kongreso ug Senado, ug ang nasud maghimo og Independent Impeachment Court nga maoy moatiman sa mga impeachment complaints.

Gihimo ni retired Justice Noel Tijam kining maong sugyot kay duna man gu’y mga magbabalaod nga nagtinguha paghimo og kausaban sa atong Konstitusyon.

Matud ni Tijam “I suggest that the power of impeachment be removed from Congress because of its tainted history of corruption, bias, prejudice, political influence, favoritism, partiality and lack of independence.”

Ang sugyot niya nga ang Independent Impeachment Court pagalangkoban sa mga retired justices sa Supreme Court, retired nga mga senador ug kongresista, mga kanhi president ug kanhi bise presidente nga napamatud-an nga dunay integridad ug matinud-anon sa serbisyo.

Kon matuman ni wa nay mga opisyal gikan sa “three branches of government” nga makasalmot sa Impeachment Trial kay sila hayan dunay personal interest sa pag-impeach sa usa ka opisyal.

Ang resulta niini, ang mga sakop sa Executive, Legislative ug Judiciary, makatrabaho gyud nga dili mabalda ang ilang mga gitahas nga katungdanan.

* * *

Naguol ko kay karong sunod semana, ug sa mosunod pa nga mga adlaw, mosulbong pagbalik ang presyo sa mga petroleum products kay mibalik na usab ang kaguliyang ug gubat sa Iran ug United States.

Ang Iran dili na mopaagi bisan unsang barko sa Strait of Hormuz, ang dagat nga agianan sa mga oil tankers nga magkarga unta og mga krudo ug gasolina gikan sa mga oil refineries sa Gulf Countries.

Giatake sa mga fighter jets sa United Stated ang mga vital installation sa Iran, ug tungod niini, mibawos usab ang Iran sa pagpalupad og missiles paingon sa mga US military bases sa mga silingan nga nasud.

Ang kadagkoan sa Bahrain mireport nga naka-intercept sila og mga missiles nga gipalupad paingon sa ilang dapit gikan sa Iran.

Matud ni Presidente Donald Trump nga kon di na gyud makigsabot-sabot ang Iran alang sa pagtahan sa ilang mga nuclear weapon, mapugos ang United States nga mogamit sa tanan nilang pwersa.

Sa miaging semana, daghang mga magbabalaod sa United States miawhag na ni Trump nga undangon na ang pakiggubat sa Iran kay nakahatag na kini og dakong kadaot ngadto sa ubang kanasuran.

Kagahapon sa kadlawon (Biyernes), gipahibawo ni Trump nga gipasuspenso usa niya ang paghimo og grabeng pagpangatake sa Iran kay matud niya dunay kalamboan sa negosasyon nga gihimo na sa “highest official” sa Iran.

Nindot kon mao na. Paita, kon mosaka na usab ang prisyo sa petroleum products, apektado bisan ang way mga sakyanan kay mosaka man ang prisyo sa palaliton.