Pagsabotahe sa impeachment trial

Kon mo-insistir si kanhi Senate president Alan Peter Cayetano nga siya ang presiding officer sa impeachment trial ni Bise Presidente Sara Duterte, peligro nga himuon niya ang mosunod:

Mopadala siya og mga notisya sa husay ngadto sa Panel of Prosecutors sa House of Representatives ug sa defense team ni VP Sara (nga sukwahi sa mga notisya sa impeachment court nga gipangulohan ni acting Senate President Win Garchalian; o

Mo-boykot ang Cayetano bloc aron dili mahinayon ang pagsugod sa impeachment trial sa Hulyo 6 nga siya ra sab ang nagtakda.

Pero maglisod si Cayetano sa pagpamugos sa dako niyang papel sa impeachment trial:

Sama sa nahitabo sa kuwestiyonable nilang public hearing niadtong Huwebes, dili niya masugo ang Senate secretariat sa pag-apud-apod sa mga notisya, ug nipahibawo nang House prosecutors nga ang mga notisya ra ni Gatchalian ang ilang tuohan; o

Kon mo-boykot sa impeachment trial, ang bag-ong majority bloc makapadayon sa husay ginamit ang “Avelino doctrine” sa quorum, sa walay paghisgot sa posibilidad nga mahimo nang 13 o 15 para sa mas klaro ug dili na malalis nga mayoriya.

Mas ganahan sa mga notisya ni Cayetano si VP Sara. Kansang kakuwang og interes sa husay naklaro sa pagdumili pagsumiter og detalyadong mga tubag sa mga pasangil batok niya atol sa impeachment proceedings sa House Justice Committee ug bisan sa Senate impeachment court (sukwahi sa gipasidaan nga bloodbath sa iyang pag-atubang sa senator-judges).

Katungod ni VP Sara kon si Cayetano ang iyang tuohan. Pero magpadayon ang husay nga dumalahon ni Gatchalian. Moapil man siya o dili.

Sayop ang pagtuo nga ang boykot sa Cayetano bloc moseguro nga dili kaabot og 16 ka senador ang mo-konbikto ni VP Sara. Pulos politiko ang senator-judges. Nahibawo sila unsa ka-importante sa public opinion sa ilang politikanhong mga ambisyon.

Kon makabuylo ang impeachment trial, kon maablihang bank accounts ug income tax returns ni VP Sara, kon mapamatud-ang nagtago og binilyon ka pesos, kon mapamatud-ang gibolsa ang confidential funds, ug kon mapamatud-ang nangontrata og mopatay sa presidente, first lady, ug kanhi speaker, mga senador ra nga ganahang maghikog sa 2028 ang mangahas sa pag-absuwelto niya.