EDITORYAL- Naa bay classrooms ang tanan?

Ugmang adlawa magsugod na balik ang klase sa mga pangpublikong eskuylahan human sa usa ka semanang Brigada Eskuwele niadtong niaging semana .

Kada tuig libo-libong mga bag-ong estudyante ang nagpa-enroll ug kadaghanan ani sa mga pangpublikong eskuylahan, siguradong karong tuiga, pamun-an napud.

Kun pagpanglimpyo lang ang hisgutan andam na gyud tingali ang mga eskuylahan sa pagbalik sa klase ugmang adlawa, Lunes, Hunyo 8.

Pero kumusta ang kakulangon sa mga lawak-saringan o classrooms sa atong mga eskuylahan? Kumusta man ang mga gipangpatukod nga mga bag-ong edipisyo, nangahuman na ba kaha tanan?

Sa miaging tuig, gi-report  nga dunay kakulangon nga 65,000 ka lawak-saringan. Sa bag-ohay lang nga report giingong 22,000 pa ka lawak-saringan ang nakompleto ubos sa administrasyon ni Presidente Ferdinand Marcos sukad sa iyang paglingkod niadtong 2022.

Sa panahon sa administrasyong Duterte (2016-2022) nakapahimo siya og 150,149 ka mga bag-ong lawak-saringan. Apan bisan pa adto, kuwang gihapon ang mga lawak para sa mga public schools.

Ang pagtukod og mga school buildings sa mga public schools gitahas ngadto sa Department of Public Works and Highways (DPWH) ug sa Department of Education (DepEd).

Lain pa ani ang mga karaan ng mga school buildings og lawak-saringan nga gipang-repair para magamit gihapon sa mga bata.

Kumusta man ang DepEd-LGU Partnership sa pagtukod og mga school buildings? Mao man ni ang nahunahunaan karong bag-o para daw mas mapadali ang pagtukod og mga bag-ong eskuylahan para makuha-kuhaan ang kakulangon sa mga classrooms.

Kay kung ang saligan ang DPWH lang,  nakita nga dili sila kaapas sa gidaghanon sa mga bata kada tuig. Busa, gikinahanglan nga dunay laing ahensiya sa gobiyerno nga motabang parehas anang mga LGUs.

Kaso lang, dili tanang LGUs kwartahan nga makapatukod og mga school buildings, kadtong uban nga gagmay ra og income ang ilang munisipyo magkinahanglan gyud og tabang sa uban.

Gawas sa school buildings, naa sad dapat pirme sa mga plano sa DepEd kun unsay buhaton sa panahon sa mga emerhensiya sama sa mga katalagman, mag-unsa nalang ang mga bata kung dili sila makagamit sa mga eskuylahan kay nangaguba?