Nalangay nga mga kaso
Nilapas nang lugway nga gihatag ni Ombudsman Boying Remulla sa iyang kaugalingon sa pagpasaka mga kasong kriminal batok sa mga dagkong isda nga gipasanginlan sa P1.7 trilyones nga flood control scandal.
Nipasalig si Remulla nga mosamot kainit ang ting-init sa sunudsunod nga mga kaso nga ilang ipasaka. Nahuman na ang ting-init. Gideklarar na sa PAGASA ang pagsugod sa tinguwan. Dili matagbaw ang katawhan, nga hagbay rang gisaaran og hustisya sa grabeng kinawatay, kon si Senador Jinggoy Estrada ra ang incumbent nga sakop sa Kongreso ang nakiha ug napapriso.
* * *
Human napasaka ang kasong plunder batok ni Estrada, naneguro si Remulla sa mga sakop sa media nga dunay laing senador nga ilang ikiha sa Sandiganbayan ug ipabalhog sa prisohan sulod lang sa duha ka semana.
Tulo ka semana na human napriso si Estrada, nagpabiling tak-om ang buhatan sa Ombudsman unsay mga kaso nga nahingpit na ang mga ebidensiya ug busa hinog na aron maoy sunod nilang ipasaka. Tungod ba kay ang gikataho nga ikiha nga si Senador Joel Villanueva nipaluyo na sa bag-ong majority bloc sa Senado?
* * *
Laing ginganlan ni Remulla nga hapit na ikiha mao silang kanhi Senate President Chiz Escudero ug kanhi House Speaker Martin Romualdez. Pero nipasabot sayo ning buwana nga nalangay ang kaso ni Romualdez kay mga opisyal sa House wala dayon mohatag sa gikinahanglan nga mga dokumento.
Wala na maghisgot si Remulla sa kaso ni Escudero. Tungod ba kay si Escudero nibiya na sa Cayetano bloc aron sa pagsuporta ni Senate President Sherwin Gatchalian?
* * *
Nag-usab-usab ang hunahuna ni Remulla unsay kiha nilang Romualdez ug Escudero. Una, niingon siya nga mopasaka sila og kasong plunder (bisan niangkon pila ka buwan ang nilabay nga dili ganahan nga mopasaka og plunder kay lisod pamatud-an sa korte). Dayon, niingon na sab nga mas mag-una ang pagpasaka og kasong money laundering batok sa duha.
Karong bag-o, gipahibawo na sab ni Remulla nga dunay bag-ong kaso nga iyang nahunahunaan nga ipasaka batok ni Romualdez: Grand conspiracy to defraud the national treasury. Maong nangayo og dugang lugway nga mapasaka ang kaso unya na sa Septiyembre. Bantay lang ni si Remulla kon kutob ra sa istorya.
* * *
- Latest
