EDITORYAL - Panagana sa El Niño

Karong taliabot napud ang El Niño phenomenon daghan na sad ang nabalaka mahitungod sa suplay tubig, usa na niana ang Metropolitan Cebu Water District.

Dili lang  ang urban areas ang maapektahan niini, ang unang maigo mao ang mga mag-uuma sa kabukiran nga nagsalig lamang sa tubig gikan sa kinaiyahan.

Kada tuig, nagkaupaw ang kabukiran tungod sa padayung pagpamutol sa mga punoan sa mga kahoy sa kalasangan ug mga kaugmaran sa mga lugar para bukid para himuong subdivisions ug uban pa.

Usa sa nahunahunaang solusyon sa MCWD ang pagpasirado sa piniling mga fire hydrants sa pipila ka mga lugar nga giserbisyohan sa maong ahensiya.

Tungod daw ni sa matud pa nakitang pagkausik sa tubig samtang dunay gagamit niini , samtang dunay mga lugar nga galisod sa suplay sa ilang tubig tungod ani.

Kaning mga fire hydrants dako og matabang panahon sa emerhensiya ilabi na kung dunay sunog.

Gawas sa sunog, nagamit sab ni ang tubig para sa mga barangay nga nagkaproblema sa tubig ilabi na  kun dunay katalagman.

Pero nabantayan nga dili lang para sa sunog gigamit ang tubig nga gipangkuha gikan sa mga fire hydrants, gigamit sa daw ni sa pagpamisbis sa mga pananom .

Ang tigkuha og tubig mga bombero gikan sa Bureau of Fire Protection ug mga fire volunteers.

Ang MCWD miingon nga kada adlaw 8,000 cubic meters o walo ka milyones ka litrong tubig ang nausik kada adlaw.

Tungod ni sa mga gubaon ug nag-leak nga mga linya o tubo sa tanang mga lugar nga giserbisyohan nila, apil sab ana ang dili tukmang paggamit sa tubig.

Karon palang, kinahanglan nga magdaginot na ang tanan sa paggamit sa tubig.

Apan kinahanglan sab tingaling naay buhaton ang mga lokal nga kagamhanan dili lang pagdaginot og tubig ug pagpundo ani kondili ang malungtaron nga programa o proyektong panagana para a mga panahong sama niining El Niño kay apektado gyud ang tanan ilabi na ang mga mag-uuma.

Kun maglisud ang mga mag-uuma bisan pamisbis sa ilang mga pananom, siguradong mosaka ang presyo sa ilang mga produktong pagkaon.