BEST tankers pasikat sa Palarong Pambansa

MANILA, Philippines — Nagpasiklab ang Behrouz Elite Swimming Team (BEST) tankers sa pangunguna nina Behrouz Mohammad Madi Mojdeh at Yugo Cabana sa 2026 Palarong Pambansa na ginanap sa Agusan del Sur.

Kumana si Mojdeh ng isang ginto at isang tansong medalya sa secondary boys division upang makatulong sa National Capital Region na masungkit ang ika-19 sunod na overall championship crown.

Bahagi si Mojdeh ng NCR quartet na nakasungkit ng gintong medalya sa boys’ 4x100m medley relay habang humirit naman ito ng tanso sa boys’ 100m butterfly.

Sa kabila ng panalo, hindi kuntento si Mojdeh sa ipinamalas nito partikular na sa kanyang individual events.

“Going into my first individual event, I felt a bit nervous. I ended up quite disappointed with my time. I felt like I had a late start off the blocks, and my streamline felt too slow,” ani Mojdeh.

Aminado si Mojdeh na may mas ibubuga pa ito lalo pa’t matinding preparasyon ang pinagdaanan nito bago ang Palarong Pambansa.

Kaya naman ibinuhos ni Mojdeh ang lahat upang makatulong sa NCR team sa pagkopo ng ginto sa relay event.

“Immediately after that, I swam the relay and clocked a new personal best time in my 100-meter butterfly. This time around, my streamline kicked in better, and I felt much more loose and fluid in the water, unlike the tension I experienced during the 200 meter fly,” ani Mojdeh.

Target ni Mojdeh na rumesbak sa susunod na taon kung saan magsisilbing host ang Quezon City sa naturang multi-sporting event.