Nxled magpapalakas sa semis vs Capital1
MANILA, Philippines — Palalakasin ng Nxled ang tsansa sa semifinal round sa pagharap sa Capital1 Solar Energy sa 2026 Premier Volleyball League (PVL) All-Filipino Conference Siklab Series sa Philsports Arena sa Pasig City.
Lalabanan ng Chameleons ang Solar Spikers ngayong ala-1 ng hapon, habang magtutuos ang Choco Mucho Flying Titans at Akari Chargers sa alas-6 ng gabi.
Solo ng Nxled ang liderato bitbit ang 4-0 record kasunod ang Creamline (4-1), Choco Mucho (3-2), PLDT (3-2), Farm Fresh (3-2), Akari (2-3), Capital1 Solar Energy (2-3), Galeries Tower (1-4) at ZUS Coffee (0-5).
Sa tournament format, ang top four teams matapos ang single round-robin elimination ang aabante sa semifinals kung saan ang top two squads ang hahawak ng ‘twice-to-beat’ advantage laban sa No. 3 at No. 4 seeds.
Ang championship round ay isang best-of-three series.
Nagmula ang Chameleons sa 25-23, 23-25, 25-23, 25-17 pagpapabagsak sa Flying Titans sa likod nina Fil-Am Brooke Van Sickle at Myla Pablo.
“We just kept reminding ourselves to stay together, just as coach Guidetti (Etorre) kept telling us. It doesn’t matter how many sets you’re up or how many points you have. What matters is that we stay together and keep fighting,” ani Van Sickle.
Determinado naman ang Solar Spikers na makabangon mula sa pagkatalo sa High Speed Hitters at Cool Smashers matapos talunin ang Chargers at Thunderbelles.
Bukod kina Van Sickle at Pablo, muli ring aasahan ng Nxled sina MJ Phillips, Jonah Sabete-Escamillan, Jackie Acuña, EJ Cariño, setter Gel Gayuna at libero Bangs Pineda.
Itatapat ng Capital1 sina ‘Big Three’ Bella Bellen, Vanie Gandler at Erika Santos katuwang sina Pauline Gaston, Pia Abbu, Cherry Nunang, setter Juju Coronel at rookie Detdet Pepito.
- Latest
