Lapu-Lapu nangandam na sa pag-host sa 80th AWGIPC

CEBU, Philippines — Nagsugod na sa pagpangandam ang kagamhanan sa Dakbayan sa Lapu-Lapu alang sa pag-host sa 80th ASEAN Working Group on Intellectual Property Cooperation (AWGIPC) Meeting and Related Meetings nga ipahigayon sa Nobiyembre 15 hangtud  sa 20, 2026.

Nagpahigayon og coordination meeting ang city government niadtong Miyerkules uban sa mga representante sa Intellectual Property Office of the Philippines (IPOPHL) ug mga hingtungdang ahensiya sa gobiyerno aron hisgotan ang mga pagpangandam alang sa unom ka adlaw nga kalihokan.

Gipangulohan ni Atty. Misaellee Tejano, secretary to the mayor ang maong tigom diin gihisgotan ang mga pagpangandam sa logistic ug ang tagsa-tagsa ka responsibilidad sa mga opisina ug ahensiya nga moapil.

Gipresentar usab sa Lapu-Lapu City Police Office (LLCPO) ang ilang mga pagpangandam sa siguridad aron masiguro ang kaluwasan sa mga delegado ug ang hapsay nga pagpadagan sa mga meeting.

Gilaoman nga motambong sa maong kalihokan ang mga pangulo sa mga opisina nga nagdumala sa intellectual property, opisyales sa gobiyerno ug mga delegado gikan sa mga miyembro nga nasud sa Association of Southeast Asian Nations (ASEAN).

Matud ni Lapu-Lapu City Tourism Officer Garry Lao nga nangandam ang siyudad sa pag-abiabi sa mga delegado samtang gilaoman usab nga makatabang ang pag-host sa laing international nga kalihokan aron mas mailhan pa ang siyudad isip destinasyon sa mga bisita.

Gibutyag ni Lao nga gamiton sa siyudad ang kasinatian niini sa pag-host sa nangaging mga kalihokan kalabotan sa ASEAN ilabi na ang bag-ohay lang nahuman nga 20th ASEAN Defense Ministers’ Meeting (ADMM) ug 13th ADMM-Plus.

Pinaagi sa maong mga meeting mahimong usa ang Lapu-Lapu sa mga lugar nga pahigayonan sa panaghisgot sa mga nasud sa rehiyon kabahin sa intellectual property cooperation samtang nagpadayon ang mga miyembro nga nasud sa ASEAN sa pagpalig-on sa ilang kooperasyon sa maong natad. BDB BANAT NEWS