Suklam (150)
TUMAYO si Aling Perla nang lumapit si Leah. May dala itong mainit na kape at ensaymada para kay Brent.
“Sige Brent, iwan ko na kayo ni Leah. Kumain ka muna,’’ sabi ni Aling Perla.
“Salamat po Tita. Tiyak masarap na naman ang kape ni Leah.”
“Oo sige magkape ka muna. Salamat din,’’ sabi ni Aling Perla at nagtungo sa kusina.
Naupo si Leah sa tabi ni Brent.
“Magkasundung-magkasundo talaga kayo ni Mama. Ano ang napagkuwentuhan ninyo?’’
“Ipinagtapat ko na mag-on na tayo. Yun pala, alam na niya. Sinabi mo na raw.’’
“Oo. Pinagtapat ko na sa kanya. Wala akong nililihim kay Mama. Lahat sinasabi ko.’’
“Sabi nga niya sa akin. Hindi mo raw ugaling magtago ng problema.’’
“Ang tinago ko lang ay nang magtaksil si Papa. Hindi ko nasabi dahil nag-aalala ako kay Mama. Ayaw kong mag-worry siya habang nasa ibang bansa. Naunawaan naman ako ni Mama sa nangyari.’’
“Sinabi niya yun sa akin.’’
“Ano pa ang pinag-usapan n’yo?’’
“Binanggit din niya kung bakit hindi pinatawad ang papa mo. Magiging plastic lang daw siya kung magpapatawad pero sa kalooban niya ay naroon ang poot.’’
Napatangu-tango si Leah.
“Kumain ka muna,” sabi nito pagkaraan. “Baka lumamig ang kape mo.’’
Humigop ng kape si Brent.
“Ang sarap!’’
“Siyempre timpla ko yan.’’
“Baka pag mag-asawa na tayo e purgahin mo ako sa kape.’’
“Pupurgahin kita sa pagmamahal!’’ sagot ni Leah.
(Itutuloy)
- Latest
