Hiyasmin (26)
“HALIKA at nang makita mo na ang iyong kuwarto. Akala ko hindi ka pa lilipat at palalagyan ko pa sana ng banyo,’’ sabi ni Dax at kinukuha ang dalang maleta ni Hiyasmin.
“Ako na Sir Dax. Magaan lang ito,’’ sabi ni Hiyasmin. Naisip ni Dax na talagang matatag na babae si Hiyasmin.
Pumasok sila sa bahay. Tinungo ang kuwarto na ookupahan ni Hiyasmin. Binuksan ni Dax ang pinto at saka ilaw.
“Ito ang magiging kuwarto mo. May kama na at ilang gamit diyan. May built-in cabinet. May aircon. Kaunting linis na lang at puwede ka nang matulog. Ilalabas ko ang sapin ng kama at pati mga punda. Pati yung kurtina e tanggalin mo at papalitan natin. Ang natutulog dito ay ang tatay at nanay ko. Dinadalaw kasi nila ako buwan-buwan. Pero mula nang sumakit ang tuhod nila, dumalang na ang pagdalaw.’’
“Kapag dumating po sila, saan sila matutulog?’’
“Saka ko na lang puproblemahin yun. Puwede sila sa room ko at ako naman ay sa sopa sa salas. Mga dalawang araw lang naman kung mag-stay sila rito.’’
“Kakahiya sa’yo Sir Dax, dahil sa akin, ikaw ang magsasakripisyo na sa salas matutulog.’’
“Oks lang yun. Basta ang usapan natin, boarder ka rito. Baka kasi tanungin ka ng nanay ko kaya mabuti nang handa ka sa isasagot.’’
“Opo, Sir Dax. Maliwanag po.’’
“Maski kung may magtatanong sa’yo—halimbawa ang kapitbahay—sabihin mo boarder ka rito.’’
“Tatandaan ko po, Sir Dax.’’
“Mabuti nang handa ka sa isasagot.’’
Itutuloy
- Latest
