Black Pearl (7)
HINDI ko alam kung paano sasabihin kay Melis-sa na tulog na si Fernando. Hayaan na lang ba sa ganoong ayos o dadalhin sa kanilang silid. Nakahilata na si Fernando sa sopa. Kakaawa ang ayos. Ako ang natatakot na baka maulit ang ikalawang stroke at matuluyan. Iba na ang katwiran ni Fernando, wala na raw masisira sa kanya kaya wala na siyang patumangga kung uminom. Mamatay kung mamatay!
“Fernando! Fernando!”
Nagulat ako sa tawag ni Melissa. Nasa harapan na pala ito ni Fernando at ginigising ang asawa.
“Nalasing na Melissa,” sabi ko.
“Ganyan talaga ‘yan, iinom at saka biglang matutulog. Natatakot tuloy ako na baka na-stroke na.”
“Lagi ba siyang umiinom?”
“Oo. Pinagsasabihan ko pero ayaw makinig. Sabi ko baka kung mapaano siya. Pero sabi, kung hindi pa oras mamatay, hindi mamamatay.”
Napailing-iling ako.
“Ililipat ba siya sa kuwarto?” “Oo. Kakaawa ang ayos niya rito sa sopa.”
“Bubuhatin ko siya, Melissa.”
“Kaya mo?”
“Oo.”
“Tutulungan kita.”
“Huwag na. Kaya ko ’to. Noong nasa Riyadh kami at nalalasing ito e ako ang bumubuhat.”
Tinanong ko kung sa-ang silid dadalhin.
“Doon na lang sa silid na iyon. Mula nang ma-stroke siya doon na lang siya natutulog. Hindi na kayang pumanhik sa itaas.”
Inayos ko si Fernando. Tinantiya ko kung kaya ko pa gaya ng dati. Puwede pa. Mas payat nga siya ngayon.
Kinarga ko na. Naiangat ko. Saka walang anu-mang dinala sa silid na itinuro ni Melissa. Si Melissa naman ay nasa silid na at inayos ang kama.
Dahan-dahan kong inilapag si Fernando sa kama. Inayos ni Melissa ang pagkakahiga. Kinumutan.
“Matutulog ka na rin ba Frank?”
“Mamaya-maya Melissa. Uubusin ko lang ang inii-nom ko. Maaga pa naman.” Alas nuwebe pa lamang ng gabi sa relo ko. (Itutuloy)
- Latest
- Trending
