Usa namatay sa dengue sa Mandaue City

CEBU, Philippines — Natala sa Mandaue City Health Office (MCHO) ang 231 ka  mga kaso  sa dengue ug usa ang namatay sukad  sa Enero hangtod sa Hunyo 2024.

Si City Health Officer, Dr. Debra Maria Catulong, sa iyang pamahayag miingon nga ang namatay sa dengue gikan sa Barangay  Basak.

Matud pa ni Catulong  nga parehas ra ang gidaghanon sa mga kaso sa dengue sa natala sa samang mga buwan sa miaging tuig. Subling gipahinumdoman sa Department of Health (DOH)  7   ang pamaagi  sa paggamit sa 4S alang  sa pagkombate sa dengue.

Naglakip sa mga pamaagi mao ang  pagmentinar  sa kalimpyo sa lugar ilabi na sa mga dapit posibleng itloganan sa mga lamok sa sud ug sa gawas sa balay.

Padayon karon ang ilang gihimong  information education campaign labot  sa sakit nga  dengue para sa mga molupyo sa kabarangayan.—IBM BANAT NEWS