Daghang importange gitrabaho  maong wala katambong si Garcia

CEBU, Philippines — Si Cebu City acting mayor Raymond Alvin Garcia mipasabot kagahapon sa buntag kun nganong wala siya makatambong sa kalihokan sa BARUG Team Rama-initiated Independence Day Celebration nga gipahigayon diha sa Plaza, Sugbo Grounds.

Si Garcia miingon nga wala kini makatambong human nga daghan kini og 'prior engagements' isip usa ka acting mayor sa dakbayan sa Sugbo.

Kini human nga dunay mga nangutana kun nganong wala ang mayor sa maong importanteng kalihokan, ilabi na ang nagpasiugda mao ang partido diin kini nasakop nga gipangulohan ni suspended mayor Michael Rama.

Daan ng adunay mga pagduda nga nagkaaslom na ang relasyon sa duha nunot sa pagkasuspenso ni Rama nga ang hinungdan mao ang iyaan ni Garcia nga si Gob. Gwendolyn Garcia may labot sa isyu sa Cebu Bus Rapid Transit, ug ang matud pa pagsaway ni Rama sa mga gipangbuhat sa acting mayor nga sukwahi sa iyang gustong mahitabo pagpadagan sa siyudad.

"Actually, I had really a lot of prior engagement," matud pa niya.

Suma pa ni Garcia, bisan atoa siya sa trabaho gimonitor gihapon kini niya ang kalamboan sa kalihokan.

"Wa nako pugngi, wa nako gibalda. I was very cooperative when it comes to issue with necessary permits for that rally," ingon ni Garcia.

Matud pa, mao kana ang sakto sumala sa Konstitusyon bisan paman dili kini rally permit.

Kapin na usa ka bulan sukad gipahamtangan sa Office of the Ombudsman og unom ka bulang preventive suspension si suspended mayor Michael Rama ug pito ka kauban pang opisyal sa Cebu City Hall.

Daghan ang nag-atang kun si Garcia motambong sa maong kalihokan nga gipasiugdahan sa mga supporter ni Rama diha sa Plaza Sugbo Grounds sa pagsaulog sa Adlaw sa Kaugalingnan sa Pilipinas. —Jessa Grezil S. Bacus (BANAT NEWS)