RHJ magbabalik sa TNT vs Macau
MANILA, Philippines — Magbabalik sa aksyon si import Rondae Hollis-Jefferson matapos ang 10 buwan na pagrekober mula sa mabigat na injury para palakasin ang kampanya ng TNT Tropang 5G sa crossover quarterfinals ng Season 50 PBA Governors’ Cup.
Isasalang ng Tropang 5G si Hollis-Jefferson laban sa sibak nang guest team Macau Giant Pandas ngayong alas-5:15 ng hapon sa Ninoy Aquino Stadium sa Malate, Manila.
Nagkaroon ang three-time PBA Best Import ng ruptured right Achilles tendon habang naglalaro para sa Meralco sa EASL noong Disyembre.
Papalitan ng 6-foot-6 na si Hollis-Jefferson sa TNT si Nick Hornsby na naglista ng 23 points, anim na rebounds, apat na assists at tatlong steals sa kanilang 116-98 panalo sa San Miguel noong Sabado.
“I don’t feel any ill-will about that. I know what my job is. Just given me the opportunity to be here for whatever it is, is a blessing,” sabi ni Hornsby na pumalit kay Rahlir Hollis-Jefferson.
Kumpleto na ang mga quarterfinalists sa Group A sa pangunguna ng NLEX Road Warriors (8-2), Beermen (7-3), Tropang 5G (6-4) at Converge FiberXers (6-4), habang talsik na ang Terrafirma Dyip (4-6), Titan Ultra Giant Risers (2-8) at Giant Pandas (2-8).
“Whoever it is na makakalaban namin sa kabila in the quarterfinals it’s going to be a tough match-up,” ani TNT coach Chot Reyes. “So, we really have to take advantage of these games to sharpen, that’s number one, and also to get the other guys back.”
Nasa Group B ang quarterfinalist Magnolia (6-3) sa itaas ng Rain or Shine (4-3), Phoenix (4-3), Blackwater (3-4), Barangay Ginebra (3-5) at Meralco (3-5).
Sa ikalawang laban sa alas-7:30 ng gabi ay magtutuos sa krusyal na laro ang Bossing at Bolts.
- Latest
