Nahalin sa China
Imbes tarungon og tubag, gilubag ni Bise Presidente Sara Duterte ang kabalaka nga nasuburnohan siya sa China pinaagi sa iyang kompaniya nga nadokumento sa Anti-Money Laundering Council (AMLC) nga nakadawat og ?319 milyones gikan sa mga kompaniya sa China, tulo nila gipanag-iya sa Chinese Communist Party.
Sayop ang sulti ni VP Sara nga gideklarar sa administrasyon ni Presidente Ferdinand Marcos Jr. nga hulga sa nasudnong seguridad ang pakignegosyo sa China. Ang imbestigahon sa mga ahensiya sa gobyerno mao ang kalehitimo sa banana chips export business sa iyang Cale88 Food Corp.
Imbes mag-imbento og istorya, angayng tubagon ni VP Sara asa sa duha ka numero sa Cale88 ang tinuod: Ang ?208 milyones nga income nga ilang gideklarar sa Bureau of Internal Revenue (BIR); o ang ?776 milyones nga nasubay sa AMLC nga nadawat sa bank accounts sa Cale88 gikan sa China ug Hong Kong.
Ipakapin na lang sab og esplikar nganong walay bisan usa ka trabahante ang Cale88 sa 2023 ug 2024 ug duha ray trabahante sa 2025 kanus-a nideklarar sila og kita nga ?150 milyones ug alkanse nga ?6 milyones.
Dili krimen ang negosyo uban sa China. State Grid Corp. of China sa gobyerno sa China ang tag-iya sa 40% sa National Grid Corp. of the Philippines, ang niladlad sa higanteng mga kable sa kuryente gikan sa power plants ngadto sa power distributors. Ang 60% gipanag-iya sa Synergy Grid of the Philippines nga gitunga nilang Henry Sy Jr. ug Robert Coyiuto Jr.
Ang daghang mga negosyo sa Pilipinas ug China nagpadayon bisan sa ilang panghasi sa West Philippine Sea (WPS).
Human ipasabot ang kalehitimo sa ilang negosyo uban sa China (hinaot motakdo ang ilang halin sa kapasidad sa ilang planta ug aktuwal nga shipments sa banana chips), hinaot nga gahinan og panahon ni VP Sara pagtubag ang lehitimong pangutana sa mga mangingisda sa WPS:
Tak-om ba sa pagpalayas sa Chinese vessels nila gikan sa labing abundang pangisdaan sa Scarborough Shoal ug sa panghudlat batok sa mga sakop sa Philippine Coast Guard, Bureau of Fisheries and Aquatic Resources, ug Philippine Navy, kay nahalin na sa minilyon ka pesos nga bayad gikan sa China?
- Latest
