Sugbo naareglo na?

Kon naglibog ka nganong wala pay bisan usa ka kongresista, o opisyal sa Department of Public Works and Highways (DPWH), o kontraktor sa Sugbo nga nasilotan sa ?1.7-trilyones nga flood-control scandal, ang kinadak-an nga kawat sa atong panahon, wala ka mag-inusara.

Hangtod karon, kapin sa walo ka buwan na human sa “Mahiya Naman Kayo!” nga State of the Nation Address (SONA) ni Presidente Ferdinand Marcos Jr., walay napasakaan og kaso sa gipasanginlan nga labing hakog nga mga kawatan sa ?50 bilyones nga flood-control projects sa Sugbo.

Niay mga timaan nga, kon walay himuon ang mga Sugbuanon, andam nang Malacañang nga kalimtan na lang ang ilang pasalig nga silotan ang tanang responsable sa anomalusong mga proyekto nga wala kasagang sa pagkabanlas sa kabalayan daplin sa mga sapa nga niresulta sa kamatayon sa 150 ka mga biktima atol sa bagyong Tino sa Nobyembre 4 sa niaging tuig:

Wala tumana ang saad ni DPWH Secretary Vince Dizon nga pasakaan og kaso ang mga tigpasiugda sa substandard ug ghost flood-control projects sa Sugbo labi nang mga naguba sa bagyong Tino;

Wala tumana sa Department of Trade and Industry (DTI) ang hulga nga suspensuhon ang lisensiya sa mga kontraktor nga gipasakaan og kaso atubangan sa Philippine Contractors Accreditation Board (PCAB) human gilambigit sa flood-control scandal (naapil sa lista sa DTI ang QM Builders ni Allan Quirante, ang nakasipong sa kinadak-an nga flood-control projects sa ikapitong distrito, unang distrito ug ubang bahin sa Sugbo);

Wala tumana sa Ombudsman ang pasidaan nga apil sa labing unang ipadakop sa Sandiganbayan si Terence Calatrava, kanhi presidential assistant for the Visayas ug bayaw ni kanhi House speaker Martin Romualdez, nga ginganlan sa magtiayong Sarah ug Curlee Discaya nga nagsige og pangilkil og minilyon ka pesos nga komisyon gikan nila; ug

Human kanselaha ang ilang junkets sa nagkalainlaing kanasuran tungod sa pagkabisto sa eskandalo sa niaging tuig, nibalik nang mga politiko ug ilang mga pamilya paglaag karong tuiga ginastohan sa ilang paboritong mga kontraktor (asawa sa kontraktor nangulo sa 65 niya ka mga higala nga gihatagan og shopping allowance nga ?75,000 kada usa ngadto sa China).

BLURB:

“Kapin sa walo ka buwan na human sa “Mahiya Naman Kayo!” nga State of the Nation Address ni Presidente Ferdinand Marcos Jr., walay napasakaan og kaso.”