Dunay giliwatan
Atol sa pagdumala ni Amenah Pangandaman sa Department of Budget and Management (DBM) sa niaging tulo ka tuig:
- Naapil nang daan ang flood control ug ubang infrastructure projects nga walay klaro unsay kapuslanan sa National Expenditure Program (NEP), ang budget nga gisumiter ni Presidente Ferdinand Marcos Jr. ngadto sa Kongreso; ug
- Gitugotan ang pag-umol sa “Leadership Fund,” katunga sa tinuig nga budget sa Department of Public Works and Highways (DPWH), nga nihatag og usa ka bilyon ka pesos kada kongresista ug kada senador para sa gipasiugdahan nila nga mga proyekto.
-o0o-
Napamatud-an sa staff ni Senador Ping Lacson nga tinuod ang sulti ni kanhi Kongresista Zaldy Co nga dunay ?100 bilyones nga balor sa mga proyekto nga nasukip sa bicameral conference committee sa 2025 budget.
Lalisunon pa kon ang presidente bay nagsugo o gigamit lang ang iyang ngalan. Pero naklaro na nga nahitabo ang insertion tungod sa pagpatuo ni Co sa gidudahang sindikato sa Malacañang: Nga naglakip ni Pangandaman, Presidential Legislative Liaison Adrian Officer Bersamin, apo ni kanhi Executive Secretary Lucas Bersamin, ug sa Bol-anong si Education Undersecretary Trygve Olaivar.
-o0o-
Nangagpas si Ombudsman Boying Remulla nga natental si Pangandaman sa dakong kuwarta nga ilang gibahin (labing menos ?8 bilyones) ug sa hingpit nga pagsalig sa presidente sa iyang pagdumala sa budget.
Nga nitakdo sa nahaunang mga reklamo sa mga suod nga presidente. Nga ganahan siya sa titulo pero walay gana sa trabaho. Maong gitugyan ang tanang responsibilidad ngadto sa mga sakop sa Gabinete. Nga nakadasig nilang Pangandaman ug kaubanan sa pag-apil sa ilang nakit-an nga grabeng kinawatay.
-o0o-
Kon mapamatud-an ang pasangil batok ni Pangandaman, duna siyay giliwatan: Iyang amahan nga si Nasser Pangandaman Sr. gikiha sa paggamit sa siya pay Agrarian Reform secretary niadtong 2009 sa ?900 milyones sa Malampaya fund para sa pekeng proyekto ni Janet Lim Napoles, gipasanginlang pork barrel queen, ug pagbubo og ?15 milyones kang Napoles gihapon dihang kongresista siya niadtong 2011.
Pagmatuod nga marka pataka ang lideratong Marcos: Iyang gitudlo si Pangandaman Sr., bisan sa mga kasong giatubang ug tungod sa rekomendasyon sa anak nga si Amenah, sa pagdumala sa binilyon ka pesos para sa rehabilitation sa Marawi City.
- Latest
