Sabotahe ray dag-anan

Gipasidan-an si Cebu Governor-elect Pam Baricuatro nga dili istorya lang ang hulga ni outgoing Governor Gwen Garcia nga gipahimutang na niyang daan ang tanang legal nga sukaranan sa pagpadayon pagpatuman sa Suroy-Suroy Sugbo ug uban niyang mga programa bisan wala na siya sa Kapitolyo.

Mao ni nakit-an sa banggiitan nga mga abogado sa Sugbo nga plano sa panglawgaw ni Garcia: Sinugdanan lang ang pagtukod og trust funds; dayon gamitong sukaranan sa pagpasaka og mga kaso aron pugngan sa korte ang plano ni Baricuatro pagkanselar sa mga paukyab ni Garcia.

***

Nakalimtan hinuon ni Garcia nga wala siyay gahom sa pag-umol og trust funds. Utrong walay katungod ang iyang gisugo nga si Provincial Treasurer Roy Salubre. Ang Provincial Board ra maoy makapasar og resolusyon o ordinansa sa paghimo og trust funds.

Samtang kontrolado ni Garcia ang mayoriya sa board, karong hapon na ang kataposan nilang regular session. Hinaot nga silang outgoing Vice Governor Junjun Davide, Board Member Jiembo Borgonia, ug ubang mabuot nga mga sakop dili mosugot nga ang ilang pormal nga panamilit sagolan og maniobra pagsabotahe sa sunod nga administrasyon.

***

Pero makapugong bang mga lagda sa pagpamugos ni Garcia? Samang

•             Nagbarikada siya sa Kapitolyo og 42 ka adlaw aron pagsukol sa pagkasuspenso niadtong 2012;

•             Nitago siya sa House of Representatives aron paglikay sa dismissal order niadtong 2018; ug

•             Nisukwahi sa preventive suspension order sa 2025 sugod sa Abril 29 sa wala pa makakuha og temporary restraining order sa Court of Appeals sa Mayo 15

Determinadong maningkamot si Garcia pagsegurong magkayamukat si Baricuatro.

***

Kay ang kapin sa duha ka dekadang pagdominar sa politika sa Sugbo, mopasidaan ni Garcia nga dili na siyang kabalik sa puwesto kon:

•             Puli sa Suroy-Suroy Sugbo, mapatuman ni Baricuatro ang saad sa pagpalambo sa provincial hospitals aron matambalan ang labing kabos ug labing masakiton nga mga pasyente;

•             Ang minilyon ka pesos nga giwaldas sa Pasigarbo sa Sugbo mas mapuslan sa pagpakaon sa labing gipanggutom ug pagluwas sa minilyon ka mga bata gikan sa malnutrisyon; ug

•             Ang aroganteng pag-insistir nga siya ray nahibawo unsay makaayo sa Sugbo pulihan og matinud-anon nga pagpaminaw ug pagtubag sa labing dinaliang mga panginahanglan sa mga Sugbuanon.