Unsay mahimo ni Marcos Jr.
Kon magpadayon ang pagsaka sa pipila ka senatorial candidates ni kanhi presidente Rodrigo Duterte hangtod sa eleksiyon, gipaabot nga upat o lima nila ang makadaog karong Mayo 12. Ug modugang sa kahigayonan nga ma-absuwelto si Bise Presidente Sara Duterte sa impeachment trial nga sugdan sa bag-ong Senado sa Hulyo.
Pero kon niabot na sa kinatas-an nga ang-ang, kay naluya na karong buwana ang mga protesta sa pagkapriso sa kanhi presidente sa The Hague, ang duha ra ka reelectionists ang magpabilin sa puwesto.
***
May mga timaan nga ang pagsulbong nanukad sa lapad ug organisado nga pagpabaha og fake news sa social media nga naglakip sa fake accounts. Gituohan nga gipalihok sa samang makinarya sa propaganda nga nakapadaog sa kanhi presidente niadtong 2016 ug sa UniTeam niadtong 2022. Gikabalak-an nga pakusgan pang maniobra aron pagdaog sa eleksiyong presidensiyal sa 2028.
Nagkinahanglan og daghang kuwarta ang operasyon. Mahimong dako og puntil ang mga Duterte. O giablihan nang gripo sa suporta sa China. Nga determinado nga ang sunod nga presidente dili mosukol sa ilang pag-ilog sa West Philippine Sea.
***
Ang konsuylo sa mga kaatbang sa mga Duterte mao nga wala molapad ang ilang politikanhong base. Ang pagsulbong nanukad sa pag-aktibo pagbalik sa ilang mga dumadapig human sa impeachment sa bise presidente ug pagkapriso sa kanhi presidente.
Wala mobalitok ngadto sa mga Duterte ang mga dumadapig nilang Presidente Ferdinand Marcos Jr. ug sa iyang senatorial candidates. Igo lang silang nahimong undecided tungod sa kapakyas ni Marcos pagsulbad sa kamahal sa mga palaliton ug kakabos.
***
Sa nahibiling tulo ka semana sa kampanya, madani ni Marcos Jr. ang pagsalig sa katawhan pinaagi sa paghimo sa mosunod nga dinaliang mga lakang:
• Pagbungkag sa kartel (nga gidudahang konektado sa Malacañang) nga maoy responsable sa artipisyal nga kamahal sa bugas humay ug ubang mga produkto sa pagkaon;
• Pagdason sa mas dakong uminto sa suholan nga gi-aprobahan na sa mga senador ug mga kongresista (nga makatabang sa mga trabahante pagtagbaw sa batakan nilang mga panginahanglan) ug pagkumbinser sa mga negosyante pagpahiyos sa ilang ginansiya; ug ang kinalisoran
• Menosan (kay dili man g’yud mapapas) ang pangawat sa iyang administrasyon.
- Latest
