Nagbaha nga kuwarta

Ang pagtimaan ni kanhi Presidente Rodrigo Duterte sa iyang birthday karong adlawa dako og kalainan sa mas sadya nga kasaulogan dihang mayor pa sa Davao City.

Sa mga dokumento nga nahipos ni kanhi Senador Antonio Trillanes IV, nalilian ang minilyon ka pesos nga sunudsunod nga nisulod karong adlawa pila ka tuig ang nilabay sa giingong joint bank account nilang Duterte ug sa iyang anak nga si Bise Presidente Sara Duterte. Gituohan nga mga gasa sa higalang mga negosyante o kita sa ilegal nga mga negosyo sama sa ilegal nga drugas.

-o0o-

Makatandog sa balatian para sa ilang mga dumadapig ang dakong gugma nga gipakita sa mga sakop sa pamilyang Duterte sa ilang panag-abot sa espesyal niyang adlaw sa The Hague, nga maoy nahimutangan sa iyang prisohan sa International Criminal Court (ICC).

Pero dili sab kalikayan ang pangutana: Diin man gikan ang nagbaha nilang kuwarta nga gawas sa minilyon ka pesos nga pasiunang bayad sa langyaw nga mga abogado nga manalipod ni Duterte sa kasong Crimes Against Humanity mora mang nanuroy lang ang tibuok pamilya sa pikas nga barangay?

-o0o-

May sukaranan ang mga kahibulong sa kadaghan diay sa kuwarta sa mga Duterte (wala pa gani mahisguti ang pagsuroy ni Kongresista Paolo Duterte sa 16 ka nasud sa mosunod nga duha ka buwan) tungod sa ilang gipakatap nga pipila ka letrato sa ka-simple sa kanhi presidente:

Kadtong iyang birthday cake nga hinimo sa linung-ag nga bugas humay nga giugbokan og kandila; ug

Kadtong pagkatangtang sa tikod sa iyang sapatos dihang nangampanya pa pagka presidente.

 -o0o-

Pero dili tang kapaabot sa mga Duterte nga madutlan sa kauwaw ning pagkabisto sa ilang pagpaka aron ingnon. Kumbinsido sila nga buta ang ilang mga dumadapig sa aktuwal nga mga panghitabo nga mosukwahi sa ilang mga paukyab.

Bahala na kon nahibaw-an sa survey sa Social Weather Stations (SWS) nga 25% na lang sa mga Pilipino ang nailad sa ilang fake news nga inosente si Duterte sa extrajudicial killings sa iyang drug war. Nagdahom gihapon nga matabonan ang kamingaw sa ilang kawsa sa kasaba ug paugat nga mga maniobra sa trolls sa social media ug taphaw nga mga protesta sa kadalanan.