Mga buslot sa kumpisal
Abunda ang mga rason sa mga nakuwangan sa kumpisal ni Koronel Royina Garma parte sa kampanya sa drugas ni kanhi presidente Rodrigo Duterte:
•Niinsistir si Garma nga walay labot sa paglista sa gidudahang mga durugista ug pagbayad sa mga polis nga nipatay nila;
•Niangkon nga wala kaapil sa bisan unsang operasyon nga niresulta sa extrajudicial killing (EJK); ug
•Nibasol sa ubang units sa kapolisan sa pagsulbong sa EJKs sa iyang hurisdiksiyon atol sa pagpangulo sa Cebu City Police Office.
***
Giawhag si Garma sa mga sakop sa House Quad Committee nga motug-an sa tanan niyang nahibaw-an. Ug sa tinuod niyang papel sa nasudnong kampanya. Kay lisod tuohan nga gipatabang siya ni Duterte sa pag-organisar, gipahibawo sa tanang detalye sa sistema, pero walay labot sa aktuwal nga operasyon.
Mas lisod tuohan nga bisan sa iyang kasuod ni Duterte, iyang influencia ni Koronel Edilberto Leonardo ug sa ilang classmates sa Philippine National Police Academy nga gipakatap sa tibuok nasud, minilyon ka pesos nga gipabaha ug kaliboan ka kinabuhing nakalas, wala sila mapiski sa duguong kampanya.
***
Aron pagmatuod nga motabang na siya sa imbestigasyon, mangahas mi og sugyot nga himuon ni Garma ang mosunod:
•Angkunon ang cover-up sa responsibilidad sa iyang mga polis sa Carbon sa kamatayon sa 4-anyos nga si Skyler Abatayo sa Bato, Ermita niadtong 2018;
•Angkunon ang iyang liderato sa duguong terorismo sa mga botante sa bukiran ug patag nga mga barangay sa syudad atol sa eleksiyon niadtong Mayo 2019;
***
•Tubagon ang pormal nga pasangil sa Philippine Charity Sweepstakes Office nga nagdawat siya og usa ka milyon ka pesos kada semana gikan sa ilegal nga sugal sa siya pay hepe sa Criminal Investigation and Detection Group niadtong 2017;
•Angkunon ang tinuod niyang papel sa pagpatay sa tulo ka Chinese convicts sa Davao Prison and Penal Farm niadtong 2016 ug pagbanhig ug pagpatay ni PCSO Board Secretary, Heneral Wesley Barayuga, niadtong 2020; ug
•Pagsaksi ug pagmatuod nga si Duterte ang tinuod nga utok sa pataka ug laktod nga pinatyanay ug pagpanggukod sa gidudahang mga durugista, apil nang inosenteng mga bata ug mga sibilyan, karibal nga mga politiko, ug personal nga mga atraso.
- Latest
