Katig-a ni Garma
Karon nahibawo na ta nganong gibakwi sa House Quad-Committee ang ilang imbitasyon ni kanhi Cebu City Mayor Tommy Osmeña pag-atubang sa komitiba gahapon: Nakadawat ang komitiba og mas dinaliang pasangil batok ni kanhi General Manager Royina Garma sa Philippine Charity Sweepstakes Office (PCSO).
Nahukman sa komitiba nga makapaabot sa sunod buwan ang kasayuran ni Osmeña sa bangis nga mga pagpamatay sa Cebu City nga gipasangil batok ni Garma. Kay dunay polis nga nikumpisal sa komitiba nga gisugo siya ni Garma pagpatay ni PCSO Board Secretary Wesley Barayuga niadtong 2020.
* * *
Sa wala pa paminawa sa komitiba ang testimoniya ni Lt. Col. Santi Mendoza nga gisugo ug gisaaran siya og P300,000 nilang Garma ug Col. Edilberto Leonardo pagpatay ni Barayuga, nga gikatahong naghupot og mga ebidensiya sa anomaliya sa STL nga naglambigit ni Garma, giladlad sa mga kongresista ang ilang nahibaw-an parte ni Garma.
Motakdo unta sa testimoniya ni Osmeña ang pipila sa ilang nahibaw-an: Nga si Garma nitudlo sa daghan niyang paryente sa PCSO, dunay mahalong balay sa bukirang barangay sa Cebu City ug nigamit sa kuwarta sa PCSO pagtabang sa STL Party-list.
* * *
Gitug-an ni Garma sa komitiba ang rason sa iyang resignasyon sa PCSO niadtong 2022: Kay gipa-bakasyon ni kanhi Executive Secretary Salvador Medialdea human naghimo si Garma og imbestigasyon sa pagbanhig sa iyang kanhi guwardiya nga si Col. Chuck Barandog sa Cebu City niadtong 2022.
Nipasangil si Garma nga walay imbestigasyon nga gihimo ang mga opisyal sa kapolisan sa diriyot pagkamatay ni Barandog ug nahadlok ang mga polis sa Cebu City sa paghatag og testimoniya.
* * *
Wala mopakita si Garma og samang interes sa kamatayon ni Barayuga. Niinsistir nga wala siya magtagad kay, lahi sa kasong Barandog, gi-imbestigar sa kapolisan ang pagbanhig ni Barayuga. Nagpadayon ang kakuwang og interes bisan wala masulbad ang kamatayon ni Barayuga hangtod sa resignasyon ni Garma niadtong 2022.
Ang kumpisal ni Mendoza sa iyang papel sa pagpatay ni Barayuga momatuod sa kapuslanan sa imbestigasyon sa quad-committee. Hinaot nga madasig ang ubang mga polis nga gisugo sab sa laktod nga pagpatay sa mga biktima nga igo lang gidudahan o igo lang nasaypan o wa gyoy kalambigitan sa ilegal nga drugas.
- Latest
