Nasobrahan nga bilib
Daghang gitulisok si kanhi presidente Rodrigo Duterte sa nag-ung-ong nga arrest warrant, kana kon wala pa maluwati, sa International Criminal Court (ICC) ug nagka-klarong kahigayonan nga ipadakop siya sa administrasyon.
Gibasol niyang giingong konsabo nilang kanhi bise presidente Leni Robredo ug Malacañang (bisan gisalikway nilang Senador Risa Hontiveros ug kanhi senador Leila de Lima ang sugyot ni kanhi senador Antonio Trillanes nga pakig-alyansa sa administrasyon) ug ang diktasyon sa Estados Unidos (bisan ang US dili sakop sa ICC ug nibabag sa pagpadakop sa ICC ni Israel Prime Minister Bejamin Netanyahu).
***
Hinaot mahunghongan si Duterte nganong nakadako ang kahigayonan nga mabalhin ang iyang address gikan sa Davao City ngadto sa prisohan sa ICC sa The Hague:
• Laktod nga pinatyanay sa Davao Death Squad (DDS) sa siya pay mayor ug bise mayor uban sa iyang anak nga si karon Bise Presidente Sara Duterte Carpio;
• Laktod nga pinatyanay sa tibuok Pilipinas, apil sa Sugbo, dihang nibanos siya sa Malacañang sa 2016; ug
• Paghagsa sa UniTeam nga nihatag ni Presidente Ferdinand Marcos Jr. og lisensiya pagbakwi sa pasalig pagdupa niya batok sa ICC.
***
Bisan sa pasiatab nga suhito sa balaod ug sa lihok sa politikanhong mga puwersa sa nasud ug kalibotan, nasipyat si Duterte sa iyang mga banabana:
• Nga iyang popularidad ug politikanhong mga alyansa epektibong mosagang sa bisan unsang pagsuway pagpatubag niya sa gipasangil nga mga krimen; ug
• Nga si Marcos Jr. dili mangahas paglawog niya sa ICC tungod sa iyang dakong influencia sa kasundalohan ug kapolisan (nisalig nga dili silang kalimot kinsay nagdoble sa ilang suweldo).
***
Kakurat kahang Duterte, nga mao tingaling wala pakita sa publiko sa pila na ka adlaw, pagkabisto nga 50 ka sinaligan niyang mga heneral gikatahong nisaksi batok niya sa imbestigasyon sa ICC. Nataligam-an sab nga na-presidente siya kay:
• Naglaom ang katawhan nga iyang mapatuman ang gisaad nga dagkong kausaban, sama sa pagsulbad sa drugas sulod sa tulo ka buwan ug pagbadlong sa pangurakot sulod sa unom ka buwan; ug dihang nabantang nga nisamot pagtambok ang mga sindikato sa drugas ug nidaghan na hinuon ang mga kawatan sa iyang pamunoan
• Nahadlok ang katawhan pagsudya niya kay tingalig silay isunod sa pagluba.
- Latest
![](https://qa.philstar.com/images/stand-in-photo-male.jpg)