Palsipikado sa Davao

Sa kaliboan ka biktima sa laktod nga pinatyanay sa Davao City, nga gipasangil sa Davao Death Squad (DDS) ug nilang kanhi presidente Rodrigo Duterte ug Bise Presidente Sara Duterte Carpio, pila kaha ang gilista sa kapolisan nga hikog, o aksidente, o for recording purposes?

Aron dili mosulbong ang gidaghanon sa mga krimen nga ilang gi-report sa Kampo Crame? Ug aron makapadayon pagpasigarbo ang mga Duterte nga ang Davao maoy labing luwas nga syudad di lang sa Mindanao, di lang sa Pilipinas, di lang sa Asya kon dili sa tibuok kalibotan?

***

Pila sa mga tagtungod sa mga gipang-ihaw sa DDS ang gihudlat o gihaylo nga magpakahilom, ug pila sa mga nangahas sa pagsupak ang gipanghipos, aron nga walay dokumento sa kaduguon sa kampanya sa pagpintal sa Davao nga labing malinawon?

Kay nasakpan karong bag-o sa bag-ong liderato sa Davao Police Regional Office nga maoy gihimo sa mga polis sa Davao sa mga biktima sa mga krimen sa kawat, tulis, lugos, ug physical injuries. Kon gitagoan ang ordinaryong mga krimen, gi-unsa kaha sa pag-sekreto ang mas bangis nga mga tokhang?

***

Makapanagang ang mga Duterte nga way pagtugot gikan nila ang pagtabon sa mga polis sa mga krimen. Mahimo nilang pasanginlan ang kapolisan nga nasobrahan rang paningkamot sa pagpahumot para sa promosyon ug dugang mga insentibo.

Kon mao, gihangop unta nilang pagtangtang sa bakakon nga mga polis. Pero ang grabeng kasuko sa mga Duterte sa lahugay sa mga polis, nga taga Davao gipanglabay sa laing mga probinsiya ug gipulihan sa dili nila mga kaila, nagmatuod nga nahibawo sila sa lang-og nga tinagoan.

***

Nipasalig ang mga opisyal sa Sta. Cruz, Davao del Sur, nga ikiha ang mga nipalusot sa gatosan ka palsipikado nga birth certificates para sa Chinese nationals nga nasubay sa National Bureau of Investigation nga gikan sa ilang munisipyo.

Nagpabiling hilom si Davao City Mayor Sebastian Duterte ug ubang mga sakop sa ilang pamilya, human sa sunudsunod ug hapit kada adlaw nilang masuk-anon nga press statements batok sa pag-iban sa pipila ka polis sa kapin sa 300 ka mga guwardiya sa bise presidente, pila na ka adlaw human nabisto ang palsipikado nilang police blotters.