Mga petsa ni Duterte
Importante para ni kanhi presidente Rodrigo Duterte ang Marso 17, 2019. Mao ning adlawa nga napatuman ang iyang masuk-anong deklarasyon paggawas sa International Criminal Court (ICC). Nga maoy gibasehan sa iyang pangangkon nga way hurisdiksiyon ang ICC pag-imbestigar sa gipasangil nga crimes against humanity batok niya.
Bisan sa lagda sa ICC, nga gidasonan sa Korte Suprema sa Pilipinas, nga may hurisdiksiyon pang ICC sa mga krimen nga nahitabo sa katuigan nga sakop ang Pilipinas (2011-2019), niinsistir si Duterte, ug gidasonan siyang Presidente Marcos Jr., nga di nang kapanghilabot ang ICC niya.
* * *
Nataligam-an ni Duterte ang laing petsa: Disyembre 22, 2004. Siya pay mayor sa Davao City. Unom ka buwan sa wa pa moulbo ang “Hello, Garci” scandal nga diriyot makapalagpot ni kanhi presidente Gloria Macapagal Arroyo sa Malacañang. Pila ka adlaw sa wa pa ang makalilisang nga tsunami nga nipatay og 230,000 sa Indonesia ug kasilinganang mga nasud.
Ning adlawa, dul-an 20 ka tuig nang nilabay, gipirmahan sa ICC ug International Criminal Police Organization (Interpol) ang cooperation agreement nga motabang ang Interpol sa pagpatuman sa arrest warrants sa ICC.
* * *
Laing petsa nga nataligam-an ni Duterte: Hunyo 1, 2006. Kanus-a giluwatan sa Interpol ang labing unang Red Notices para sa ICC ngadto sa 184 ka sakop nga mga nasud batok sa lima ka sinumbong sa war crimes ug crimes against humanity sa Northern Uganda.
Kon gitun-an pa ni Duterte ang mga petsa sa ibabaw, mas andam unta siya sa pahibawo ni Justice Secretary Boying Remulla: Nga ang Pilipinas way obligasyon pagtabang sa ICC pero di mobalibad sa Red Notices sa Interpol.
* * *
Sa duwa sa goryo-goryo, nga paborito sa mga Duterte ug mga Marcos, di kapasanginlan si Marcos Jr. nga nagbudhi sa iyang saad sa di pagtabang sa ICC. Kay wa man siya nipasalig sa mga Duterte, bisan niadtong wa pa sila mag-unay, nga di siyang motabang sa Interpol.
Laing mga petsa nga angayng mahibaw-an sa kampo ni Duterte:
• 1956 nagpasakop ang Pilipinas sa Interpol;
• 1961 nagpasakop ang People’s Republic of China sa Interpol; ug
• 1990 nagpasakop ang Russia ug nisaad sa pagpatuman sa tanang mga lagda, apil nang Red Notices, sa Interpol.
- Latest
