Tinuod nga rason
Nganong ni-resign si Bise Presidente Sara Duterte Carpio isip kalihim sa Department of Education (DepEd). Nga mahimo ra man unta nga ipadayon ang ilang panaghigalaay ni Presidente Ferdinand Marcos Jr. hangtod nga usa nila di nang kalahutay sa plastik nga tinagdanay?
Bisan gitawag sa iyang amahan nga si kanhi Presidente Rodrigo Duterte si Marcos Jr. nga “bangag” ug bisan gitawag na siya ni First Lady Liza Araneta Marcos nga “bad shot,” gipasaligan siya sa presidente magpabilin sa Gabinete. Nganong iya mang gideklarar nga wa nang “UniTeam” dayong biya sa DepEd.
* * *
Nahibawo ang bise presidente nga nanagana ang presidente sa pag-risgo sa pagpalagpot niya sa Gabinete. Kay sa hapit tanang surveys, nagpabilin siya nga mas popular kay sa presidente. Maong bisan niulbo nang gubat sa ilang mga dumadapig, nagpadayon ang presidente sa pag-ulug-ulog niya.
Gipasidan-an ang bise presidente sa iyang amahan ug sa ubang nag-una sa duyan nga ikabangga nilang mga Marcos sa eleksiyong presidensiyal sa 2028. Pero mahimo untang paundayonan ang pagtuo nga mahimong di una sila magkarambola karon dayon. Aron makaangkon siya og dugang lugway sa pagpangandam.
* * *
Nganong nibiya man siya sa Gabinete? Wa ba mabalaka nga mapareha siya ni kanhi Bise Presidente Leni Robredo nga hingpit nga giisnab sa labing importante nga kalihokan sa Malacañang? Wa ba mahadlok nga lahi ni Robredo wa siyay ikapasigarbo nga bisan unsang makahuloganon nga nahimo sa pagkatapos sa iyang termino?
Wa ba siya matambagi nga ang tanang pundo naa sa administrasyon? Nga ang iyang popularidad nagkinahanglan og makinarya? Ug nga molihok lang ang makinarya kon dunay kuwarta?
* * *
Mas masabtan ang iyang resignasyon kon tan-awon gikan sa anggulo sa giisip niyang labing importanteng instrumento pagtuman sa iyang trabaho --ang confidential funds (CF):
?460 milyones kada tuig ang iyang CF isip mayor sa Davao City;
Maong CF ang unang gipangayo pag-asumir pagka bise presidente (?125 milyones ray gihatag sa Malacañang ug na-kaso pa g’yud sa Korte Suprema);
Maayo na lang nga naka-CF og ?650 milyones sa 2023 pero gitangtang sa iyang gibalikas nga si House Speaker Martin Romualdez sa 2024; maong
Kinsa may ganahang mosulbad sa krisis sa edukasyon nga way CF bisan usa ka dako?
- Latest
