Pagluba sa bukid

Karon pang Huwebes Santo timan-an ang pagpanghunaw ni Pilato sa responsibilidad sa nag-ung-ong nga kamatayon ni Hesukristo, pero sukad sa niaging semana daghan nang nangita og planggana aron pagpalayo sa desisyon pagkagis, paghiwa ug pagpatag sa kinatas-an nga bukid sa Cambuhawe sa Balamban sa kasadpang Sugbo.

Ang kasayuran sa mga Sugbuanon sa pagsugod na og trabaho sa luna nga tukoran sa bag-ong Capitol building naggikan sa Kapitolyo ug sa Department of Public Works ang Highways (DPWH). Ang mga letrato ug video sa gipanamastamasan nga bukid gikan sa nagpakabana nga netizens.

-o0o-

Wa koy nahibaw-an nga mga sakop sa media nga niadto sa Balamban pagsusi sa trabaho sa DPWH. Lain ning timaan sa kamingaw na sa newsrooms, pila na lang ka reporter ang nagtikaw-tikaw, nga kasagaran nagpaabot sa press releases o Facebook live sa mga politiko ug public information offices.

Wa ko sa posisyon pagreklamo. Kay utrong natanggong sa among pinuy-anan nga limitado ang katakos pagpakisayod. Nagsalig sa reports sa news organizations ug chats sa social media ug mga tawag sa telepono gikan sa mga tinubdan nga kasagaran mahadlok magpaila.

-o0o-

Maong pasayloa ang kanihit sa nahipos nga mga detalye:

•             Ang trabaho sa DPWH nagsugod sa 2022 (way petsa kay wa moboluntaryo ang Kapitolyo ug DPWH o way reporter nga nakahunahuna og pangutana) kay nag-apas nga magamit ang ?200 milyones nga gigahin sa nasudnong gobyerno niadtong tuiga para sa bag-ong Kapitolyo;

•             Nipasalig ang DPWH nga mahuman sa Hulyo 2023 o tulo ka buwan sa di pang schedule nga Nobyebre 2023; ug

•             Tanang timaan nagpakita nga wa pa mahuman hangtod sa pagkuha sa viral nga mga letrato.

-o0o-

Way opisyal nga naghisgot ug way reporter nga nagsusi:

•             Nakasumiter na ba ang DPWH o Kapitolyo (agad kinsay ganahang moangkon sa proyekto) ngadto sa Department of Environment and Natural Resources (DENR) sa Environment Compliance Certificate (ECC) ug Environmental Impact Assessment (EIA) nga magmatuod nga ang proyekto di makadaot sa kinaiyahan; ug

•             Nakonsulta ba ang mga molupyo sa kasilinganang mga lugar, labi nang mga nagpuyo sa kabalayan sa ubos, nga mas mameligro sa baha ug dahili sa yuta human giluba ang gatosan ka punoan sa kahoy ug gibungkag ang kinadak-ang bahin sa bukid.