Maldisyon imbes modernisasyon
Ang administrasyon ni Presidente Ferdinand Marcos Jr., sama sa administrasyon ni kanhi Presidente Rodrigo Duterte, naghupot og duha ka sayop nga mga pagtuo sa ilang gipamugos nga modernisasyon sa mga sakyanan nga pamasahero:
• Una, nga ang mga problema nga ipasidaan nila, human sila nahinayak pagdeklarar nga way problema, angayng isipon nga pagsamuksamok lang sa maayo nang pagkaandam nilang mga plano; ug
• Ikaduha, nga bisan unsa pa nga mga problema nga ipasidaan nila, ila na ganing madeklarar nga dali rang sulbaron, isipon nilang nasulbad na bisan wa silay bisan unsang gihimo.
* * *
Dihang nitiyabaw ang PUJ drivers ug operators sa kamahal sa modern jeepneys, gipasabot sila sa kadagkoan sa Department of Transportation (DOTr) ug Land Transportation Franchising and Regulatory Board (LTFRB) nga maabot nila ang presyo kon magpasakop og mga kooperatiba o mga korporasyon.
Dihang ang kadagkoan sa Land Bank of the Philippines (LBP) ug Development Bank of the Philippines (DBP) nipasidaan nga di kabayad ang mga drayber ug operators sa ilang utang, nipasalig ang DOTr ug LTFRB nga paapilon ang pribadong mga bangko aron nga mogamay ang utang ug interes.
* * *
Dihang nipadayag og kahadlok ang mga drayber ug operators nga di na sila ang rehistradong tag-iya sa ilang units, kay ibalhin nang ilang mga prangkisa sa ngan sa mga kooperatiba ug mga korporasyon, gipakalma sila nga makaayo sa tanang hingtungdan kon magkahugpong imbes sa nahitabo karon nga pag-iyahay:
• Molambo ang kalidad sa ilang serbisyo ngadto sa mga pasahero pinaagi sa mas dagko ug mas limpiyong mga sakyanan; ug
• Mas dako nang ilang puhonan ug ginansiya.
* * *
Pero wa pa gani kabuylo ang programa, nabisto sa publiko ug nagpa-goryo-goryo nga napugwat ang DOTr ug LTFRB sa pagkatinuod sa mga problema:
• Niangkon ang LBP ug DBP kapin na sa bilyon ka pesos ang utang nga wa mabayri sa transport cooperatives ug corporations;
• Nipasidaan ang mga kongresista nga mahimong moabot og P40 ang minimum nga plitehan sa mga pasahero aron makabayad ang drivers ug operators sa ilang utang; ug
• May mga drayber nang gikiha og carnapping sa mga kooperatiba tungod sa pag-insistir sa ilang pagpanag-iya sa units nga silay nagtukaw sa daghang katuigan aron mabayran ang binuwan nga datahan.
- Latest
