Nauwahi sa balita
Sayon ra sa SMNI ni Apollo Quiboloy ang paglusot sa posibleng kalapasan nga ilang nahimo sa mga lagda sa Kapisanan ng mga Brodkaster ng Pilipinas (KBP): Kon mogawas sila sa KBP, di na mapatuman batok nila ang mga probisyon sa Broadcast Code nga:
• Nagdili sa iresponsable nga pagsibya, sama sa pagpakatap og sayop nga kasayuran, o pagpasangil ni bisan kinsa nga komunista o terorista; ug
• Nagsugo nga ang program anchor kinahanglan nga accredited sa KBP (sa ato pa, nakatambong sa seminar sa Broadcast Code ug nakapasar sa accreditation exam).
* * *
Ang pagbuwag sa KBP maoy gihimo sa media networks sa nangaging katuigan dihang gibadlong sa KBP sa ilang pagsukwahi sa Broadcast Code:
• Ang People’s Television Network nga gipanag-iya sa nasudnong gobyerno nigawas sa KBP aron makapadayon sa pagsibya sa resulta sa lotto, kay gidili man ang pagsibya sa sugal;
• Ang GMA nigawas sa KBP kay ang gidaghanon sa ilang commercials kada oras nilapas sa limitasyon nga gitumong pagpanalipod sa kalidad sa mga programa sa radyo ug telebisyon; ug
• Ubang sibyaanan nga wa kabadlong sa mga pangabuso sa ilang blocktimers.
* * *
Kon mogawas sa KBP, mas higpit nga mga lagda ang kinahanglan nilang tumanon kay ubos na man sila sa pagduma sa National Telecommunications Commission (NTC). Giisip nga mas makiangayon ang mga lagda sa Broadcast Code kay giumol ra sab sa mga magsisibya pagpatigbabaw sa self-regulation sa broadcast industry.
Pero tungod sa kakuwang sa mga kawani ug katakos sa pagbantay sa mga estasyon nga di sakop sa KBP, inutil ang NTC sa pagbadlong sa mga basura sa kahanginanan.
* * *
Mas lisod ang paglikay sa pagkuti-kuti sa mga kongresista. Nga morang hulmigas nga namaak human hilabti ang gasto sa mga biyahe sa ilang labaw:
• Mga nagtuo nga makatabang sa SMNI ang kasuod ni Quiboloy ni kanhi presidente Rodrigo Duterte nauwahi sa balita; ug
• Mga naglaom nga ang makabungog nga mayoriya nga nidason sa tanang paukyab sa administrasyong Duterte modupa gihapon sa ilang red-tagging ug fake news klarong wa kasabot sa implikasyon sa pagtangtang sa confidential funds ni Bise Presidente Sara Duterte Carpio ug sa mga resolusyon pabor sa imbestigasyon sa International Criminal Court batok sa kanhi presidente.
- Latest
