Kon ligdong si Brawner
Maayong manggugubat si Heneral Romeo Brawner batok sa mga rebeldeng komunista, mga terorista sa Marawi ug mga rebeldeng Muslim sa Mindanao. Pero di siya kamao nga mopadangat og mensahe ngadto sa kasundalohan:
• Iyang pahinumdom nila sa pagmatinud-anon sa gipanumpaan nga misyon sa pagpanalipod sa republika nasayop sa pagsabot nga pasidaan batok sa kudeta;
• Iyang tambag nga magpabilin silang motahud sa chain of command nasaypan nga pagbisto sa hulga sa pagpalagpot ni Presidente Ferdinand Marcos Jr. sa puwesto; ug
• Iyang awhag sa panaghiusa nasaypan nga pag-angkon nga tinuod ang destabilization efforts.
***
Ambot nakalimot ba lang si Brawner nga isip hepe sa Armed Forces of the Philippines (AFP) mahimong itaho sa media ang tanan niyang sulti. Nga natapos nang mga adlaw sa ubos pang iyang ranggo nga pakigsulti sa kasudalohan kutob ra sa mga suok sa Kamindanawan.
Pero nahimo siyang tigpamaba sa AFP. Siyay labing suhito, ug maoy tigtambag sa iyang mga labaw, sa panginahanglan sa pagmatngon sa pagluwat og bisan unang pamahayag aron nga di masaypan og sabot ug, labaw sa tanan, di mapaukyab sa pipila ka sakop sa media.
***
Napamatud-an ni Brawner sa makadaghang higayon ang iyang kaisog sa natad sa panggubatan. Pero nabantang ang iyang katalawan sa pag-angkon og responsibilidad sa mga implikasyon sa iyang diskurso.
Wa hinuoy nakahunghong niya, sa wa pa pasanginling mga sakop sa media nga nilubag sa iyang mensahe, nga na-Facebook Live ang diskurso. Ug di na mapapas ang iyang sulti: “Marami tayong naririnig ngayon na mga masasabi na destabilization efforts, na dapat palitan ang ating pangulo, dapat magkaroon ng coup d’etat.”
***
Gibuko sab siya ni kanhi secretary Eliseo Rio Jr. sa Department of Information and Communications Technology (DICT) ug ubang retiradong mga opisyal sa AFP nga nagpasiugda sa September Twenty-One Reform Movement (STORM) nga wa sila makigsulti niya sa bisan unsang plano pagpalagpot sa presidente.
Kon ligdong si Brawner, iyang nganlan ang gikasulti nga nangangkon nga mga tigpasiugda sa destabilization efforts nga nangimbitar sa aktibong mga sundawo sa protesta niadtong Septiyembre 21. Ug ikiha sila kay seryusong kalapasan sa balaod ang pagsuway sa pagpukan sa gobyerno. O angkunon nga nagpataka lang diay siya og istorya.
- Latest
