Nganong sadya ang way nahot

Labing abunda nga tinubdan sa kuwarta sa piniliay mao ang nasudnong mga partido. Kay sila ang makasipong sa kinadak-an nga amot gikan sa kinadatoan nga mga negosyante.

- Maong kuwang ang pahiyom sa lokal nga mga politiko sa midterm elections kay mapugos pagkuot sa ilang hiniposan aron igasto sa kampanya ug ipamalit og mga boto, gawas lang kon may senatoriables nga mamahin sa mas dagko nilang puntil; ug

- Maong mag-piyesta ang mga politiko sa mga tuig nga may piniliayng presidensiyal, sama karong tuiga, kay magbaha ang kuwarta sa presidentiables ug senatoriables.

***

Mas daghan og kuwarta ang mga partido sa administrasyon. Kay samtang kasagaran sa mga negosyante mohatag sa pikas ug pikas, mas dako ang ibubo sa mga nagtungkawo sa gahom. Kay mag-agad nila unsa kahapsay o kahasol ang dagan sa mga negosyo.

Maong kumon nga mahitabo dayong piniliayng presidensiyal nga maglumba ang lokal nga mga opisyal sa paghurar sa administrasyon. Labi na sa mga partido nga di lang kutob sa sulti nagsugod na g’yud og sabod og minilyon ka pesos sa ilang pagduaw sa mga probinsiya, syudad, lungsod, ug barangay.

***

Maong makapakugang nga may lokal nga mga opisyal nga nisukwahi sa ilang nasudnong mga partido nga nagpaluyo ni kanhi Senador Ferdinand Marcos Jr. Ug nideklarar sa ilang suporta sa kandidatura nilang Bise Presidente Leni Robredo ug Senador Kiko Pangilinan.

Dako ang risgo nga di silang kabahin sa way kinutoban nga pundo sa ilang mga partido. Kon kuwartahay ang piniliay, maisip nga politikanhong paghikog ang ilang gihimo. Duna bay nakit-an sa ilang mga nataran nga nataligam-an sa nasudnong mga tagduma?

***

Way katungod nga magsadya ang kampanya nilang Robredo ug Pangilinan. Way nahot ang ilang Partido Liberal. Nga hagbay rang gitalikdan sa ilang kaubanan nga hagbay rang ni-amen sa Malakanyang. Wa na mailhi, wa pa g’yuy kuwarta ang bag-o nilang mga alyado.

Pero nganong ang rallies man nilang Robredo ug Pangilinan sa Luzon, Kabisay-an, ug Mindanao ang labing daghan ug labing buhi? Diin man gikan ang makapanakod nga pagsalig ug paglaom sa ilang mga dumadapig? Unsa may nakit-an sa mga botante sa kampanya nilang Robredo ug Pangilinan? Nga nataligam-an sa nanggungis na nga mga tigmaniobra sa politika?