Liderato sa katalagman

Usa sa mga pangutana ni anhing Padre Paking Silva sa mga aplikante sa mga posisyon nga administratiba, apil nang mga managers, sa bantogang Cebu Electric Cooperatives (CEBECO): “Kamao ka bang moluto?”

Ang kahibung sa mga gipangutana natubag dihang niabot ang sunod nga bagyo. Nga nakapatumba sa mga poste ug nakaputol sa mga kable sa CEBECO. Tanang managers ug nadestino sa upisina gihatagan ni Padre Paking og bag-ong trabaho. Silay magluto sa pamahaw, paniudto, panihapon, ug meriyenda. Aron nga way hunong ang trabaho sa linemen pagpabalik dayon sa suplay sa kuryente.

***

Human sa bagyong Odette niadtong Disyembre 16, 2021, nisulbong ang panginahanglan sa tubig tungod sa pagkapawong sa mga gripo sa Metro Cebu Water District (MCWD) ug ubang kompaniya sa tubig. Maong nagpahimus ang mga mamaligyaay og binotelyang tubig sa pagpaburot sa presyo.

Pero wa mokabayo sa panahon ang Pamilyang Lua, tag-iya sa kinadak-ang kompaniya sa bottled water, Philippine Spring Water Resources Inc., tighimo sa Nature’s Spring. Niabli sa ilang mga planta ug nanghatag og tubig sa mga silingan. Ug nipuno sa water tankers nga ni-apud-apod og tubig sa kabaranggayan.

***

Bisan ang mga labing kabos nga nahimutang sa posisyon sa pagtabang wa mangiyugpos. Si Armando Paraiso, drayber og habal-habal sa Maribago, may poso sa ilang nataran nga wa mahubsi sa tab-ang nga tubig sukad pa sa ilang mga ginikanan.

Imbes hakpon para sa iyang pamilya, o pabayron ang mga desperado nga mokawos, gi-ablihan ang iyang poso. Gilibre para sa tanang nagkinahanglan tibuok adlaw ug gabii. Hangtod nga nahibalik ang naandang tinubdan sa tubig.

***

Si Consul Julie Alegrado Vergara naabtan ni Odette sa Bluewater Maribago Resort nga gipanag-iya sa ilang pamilya. Imbes mahugno sa kalapad sa kadaot nga nabantang pagmata niya sa kadlawon sa Disyembre 17, nanilhig sa palibot. Nisunod niyang ubang mga sakop sa pamilya ug mga kawani.

Labihan kalapad sa pagpanlimpiyo nga human sa pila ka adlaw napapas ang tanang timaan sa katalagman. Gawas sa pagpanilhig ug pag-atiman sa guests nga nilingkawas sa ka way kuryente ug tubig sa ilang mga pinuy-anan, si Consul Julie nanghipos, namutos, ug nanghatag sab og relief goods sa labing grabeng naigo sa katalagman sa Mactan, Olango, ug Carcar.