Panawagan sa mga boluntaryo

Modason ko sa awhag ni Cebu City Councilor Dave Tumulak sa electricians ug electrical engineers sa kabarangayan sa pagboluntaryo sa ilang mga serbisyo aron mas paspas nga mapabalik ang suplay sa kuryente sa mga lugar nga naigo sa bagyong Odette.

Mangahas ko og palapad sa iyang awhag ngadto sa mga barangay gawas sa Cebu City nga nagusbat sab ni Odette. Kansang mga molupyo nagkinahanglan sab sa mas dinalian nga pagbalik sa kuryente. Aron duna nay suplay sa tubig ug linya sa komunikasyon. Nga labing gikinahanglan sa ilang inadlaw nga panginabuhi.

 -o0o-

Ang pagdasig sa mga boluntaryo gihimo ni Tumulak dihang konsehal pa sa barangay hangtod na-barangay kapitan sa Basak: Iyang gilista ang tanang electricians, doktor, nurses, inhinyero, ug ubang propesyonal sa iyang barangay ug gisabot nga mahimong kinahanglanon ang ilang tabang sa mga emerhensiya.

Mapuslanon kon sundon ang iyang advocacy sa ubang syudad ug lungsod. Nga nagkinahanglan sa tanang tabang aron pagtimbakuwas gikan sa katalagman. Seguro kong ang eletricians ug electrical engineers maoy labing pinangita human ni Odette. Pero kon maka-boluntaryo bisan pila lang ka oras dako nang tampo.

-o0o-

Mangahas sab ko pakigsawo ninyo sa pagtinabangay sa among mga silingan sa mas dinaliang pagbalik sa suplay sa kuryente. Gihulagway sa taga Visayan Electric ang Royale Cebu Estates Subdivision nga maoy labing grabeng naigo ni Odette kay 56 ka poste sa suga ang natumba.

Gipasidan-an mi nga mahimong maabtan og pila ka buwan una mi makasiga pagbalik. Di ming kapamugos kay sa lagda sa reenergization ang labing guba maoy labing uwahi nga maatiman.

-o0o-

Imbes maluya, nilihok ang among mga silingan:

- Si Roger Hsia sa BNR Construction nipahuwam sa iyang backhoe, crane, truck, ug mga trabahante sa paghawan sa kadalanan, pag-ibot sa natumbang mga poste, pag-andam sa lungag para sa bag-ong mga poste, paghakot sa bag-ong mga poste gikan sa supplier sa Visayan Electric ug pagtabang pagpabarug sa bag-ong mga poste;

- Lain namong silingan, silang Ernie ug Agnes Abunda sa Ebatech Corp., nipahuwam sa ilang linemen ug boom truck sa pagpabarug sa bag-ong mga poste ug pagtaod sa mga alambre; ug

- Kaming way ekipo ni trabahante nitampo og pagkaon, bugnawng tubig, ug abiba para sa mga trabahante.