Pinaburot nga herd immunity
Ang maayong balita mao ang pahibawo sa Malacañang nga dunay 23 ka syudad nga nakaangkon og herd immunity batok sa COVID-19 kay 70% sa ilang populasyon fully vaccinated na. Ang di maayong balita mao nga dunay duha ka sayop ang pahibawo:
- Una, pinaburot ang giangkon nga porsiyento sa mga nabakunahan nga mga molupyo sa pipila ka syudad; ug
- Ikaduha, mapuslanon lang ang pangangkon sa herd immunity kon ang mga syudad hingpit nga manira sa ilang mga utlanan aron di makagawas ang ilang mga molupyo ug di makasud ang taga gawas.
* * *
Sampol sa ikaduhang sayop: Mapuslanon ang herd immunity sa Lapu-Lapu ug Mandaue, nga mao ray mga syudad sa Central Visayas nga naapil sa lista, kon:
• Selyohan ang tanan nilang utlanan aron di masagolan sa taga ubang syudad ug lungsod ug aron pagtanggong sa ilang mga molupyo paglikay nga matakdan sa taga ubang lugar nga di pa sama kadaghan ang nabakunahan;
• Kon tak-opan ang Mactan Cebu International Airport ug ang tanang pantalan sa duha ka syudad; ug
• Kon manirang tanan nilang negosyo kansang mga trabahante ug kustomer naglakip sa taga gawas.
* * *
Ari ta sa unang sayop. Pinaburot ang pangangkon nga 70% ang nabakunahan sa pipila sa 23 ka highly-urbanized cities nga nalista: San Juan City, Mandaluyong City, Pateros City, Marikina City, Taguig City, Pasay City, Las Piñas City, Parañaque City, Manila City, Muntinlupa City, Makati City, Valenzuela City, Quezon City, Navotas City, Pasig City, Malabon City, Caloocan City, Baguio City, Angeles City, Iloilo City, Lapu-Lapu City, Mandaue City, ug Davao City.
Sampol sa duha ka syudad dinhi sa ato: Hangtod sa Disyembre 5, sa kinabag-ohang taho sa Department of Health, 225,036 ang fully vaccinated sa Mandaue, o 62% sa populasyon nga 364,116 (segun sa 2020 census); ug 227,073 ang fully vaccinated sa Lapu-Lapu, o 46% sa populasyon nga 497,604 (segun sa 2020 census).
* * *
Mao ni problema sa mga tagduma sa atong pagpamakuna batok sa COVID-19. Mas ganahan silang mangita og nagkalainlaing paagi sa pagpaburot sa mga numero kay sa aktuwal nga pagpalapad ug pagpaspas sa pagpamakuna.
Maong nangangkon nga 70% nay nabakunahan pinasikad sa target population di sa tibuok nga populasyon.
- Latest
