Nganong nagpabilin nga kuwang
Gitambagan ang pamunoan ni Presidente Rodrigo Duterte sa mga eksperto nga gipangulohan ni kanhi Health Secretary Esperanza Cabral nga mabadlong lang sa paspas ug lapad nga tinakdanay sa Covid-19 sa nagkalainlaing bahin sa Pilipinas kon dugangan ang swab testing. Nisugyot sila og 130,000 ngadto sa 160,000 ka tests kada adlaw.
Nipasabot si Cabral nga ang lapad nga swab testing motultol sa mga lugar sa tinakdanay, matambalan ang mga natakdan sa di pa mograbeng kahimtang ug masubay ug mabuwag ang close contacts sa di pa makapanakod sa mas daghan.
* * *
Pero niinsistir ang Inter-Agency Task Force (IATF) batok sa Covid-19 nga mas brayt ang ilang mga eksperto. Ilang testing czar nga si Vince Dizon nipasalig nga takos na ang kapin 200 ka molecular laboratories sa tibuok nasud sa paghimo og labing menos 90,000 ka swab tests kada adlaw.
Gihimo ang pasalig duha ka buwan na ang nilabay. Pero nagpabilin nga 42,000 ra ka tests kada adlaw ang average sa niaging buwan sa Mayo. Wa ipasabot nilang Dizon ug kaubanan nganong wa matuman pero wa sab bakwia ang pasalig.
* * *
Human sa pasalig ni Dizon nipahibawo ang Department of Health (DOH) nakapalit nang Office of Civil Defense (OCD) og antigen rapid test kits nga ipakatap nila sa mga lugar nga nisulbong ang tinakdanay aron nga apilon na sa inadlaw nga ihap sa mga kaso.
Sama sa pasalig sa mas daghang swab tests, way ek ang DOH unsay nahitabo sa antigen kits. Posibleng katin-awan: OCD di DOH ang namalit kay way bilib ang tinuod nga mga eksperto sa rapid test kits.
* * *
Ang pagsulbong sa bag-ong mga kaso sa Davao ug tanang rehiyon sa Mindanao ug sa pipila ka lugar sa Kabisay-an ug Luzon nasubay nga tungod sa, nakatag-an ka, kakuwang sa testing. Nga niresulta sa positivity rate nga hangtod 90% sa Palawan ug 80% sa Bohol.
Nangutana na si Senador Risa Hontiveros nganong way mass testing hangtod karon? Posibleng tubag: Pribado ang kasagaran sa mga laboratoryo, maka-test lang kon may bayad; ug wa magtagad ang mga laboratoryo sa gobyerno sa pagpalapad sa ilang kapasidad sa swab testing. Bisan sa pagarpar nilang Dizon ug kaubanan.
- Latest
