Kanus-a angkunon ug sulbaron
Karong duna nay langyaw nga namatay human balibari sa duha ka pribadong tambalanan sa Mandaue City ug Cebu City, kon tinuod ang pasangil ni Foreign Affairs Secretary Teddy Boy Locsin, hinaot nga tinud-on na g’yud sa pagsusi ang aktuwal nga kahimtang sa mga pasyente sa COVID-19 ug ubang mga sakit sa Sugbo.
Niinsistir ang lokal nga mga opisyal nga sayop ang kasayuran nga nadawat sa Inter-Agency Task Force (IATF) nga napuno na ang mga tambalanan. Apan nagkadaghan ang mga pasyente nga giingong gipasa-pasa sa nagkalainlaing tambalanan hangtod nga uwahi nang tanan.
***
Kay si Locsin na may nitingog, manglihok na tingali ang Department of Health (DOH) ug local government units (LGUs) sa ilang gisaad nga mga imbestigasyon. Kay samang pasalig ilang giluwatan human sa kamatayon ni Kapitan Litang Abarquez sa Pardo, Cebu City, apan way napakita nga resulta hangtod karon.
Bisan way klarong imbestigasyon niinsistir ang DOH ug LGUs nga daghang bakante sa mga tambalanan. Ambot gipatubag bang pito ka pribadong tambalanan sa Cebu City ug Mandaue City nga gipasanginlan ni Apple Abarquez, anak ni Kap Litang, nga nibalibad nila.
***
Ang mosunod mao ang mga tambalanan nga ginganlan ni Apple: Miller Hospital, St. Vincent Hospital, UC Med, Chong Hua Mandaue, Chong Hua Fuente, Perpetual Succour Hospital, ug Cebu Doctors Hospital.
Ang ginganlan ni Locsin nga nibalibad sa langyaw maong Chong Hua Mandaue ug Chong Hua Fuente. Mga higala sa langyaw nipasangil og laing pribadong tambalanan nga unang nibalibad niya niadtong Mayo ug sa mga tagduma sa iyang condo nga inay mopatambal nitanggong na hinuon niya.
***
Si Locsin nga nabantog sa iyang kalahap nga manulti way pupanagana nga nipasangil nga ang pagsulbong sa gidaghanon sa mga nataptan sa COVID-19 “undercounted” sa mga opisyal sa Cebu City. Mosumbalik ba gihapon silang Mayor Edgar Labella ug kaubanan nga sayop ang kasayuran ni Locsin?
O angkunon na lang, aron masugdan na sa pagsulbad, ang makapa-alarma nga suliran, nga maoy nakapugos sa IATF pagbalik sa Cebu City sa Enhanced Community Quarantine (ECQ), nga nagkadaghan ang kritikal nga mga pasyente sa COVID-19 sukwahi sa gibalikbalik nilang pangangkon nga asymptomatic, o way mga timaan sa sakit, ang bag-ong mga natakdan.
- Latest
