Kuwentada sa Piyesta Senyor
Kon ang Vatican nimantala na sa ilang website sa tinuig nga listahan sa kita ug gasto sa Simbahang Katoliko ug kon may mga parokya nang nipapilit sa bungbong sa sinemana nilang kolekta ug gasto, kanus-a man mohatag og kuwentada ang kaparian sa Basilica Minore del Sto. Niño sa ilang kita ug gasto sa mga misa nobenaryo ug ubang kalihokan sa Piyesta Senyor?
Di ba panahon nang tumanon sa mga tagduma sa usa sa labing dakong piyesta sa nasud ang sugo ni Pope Francis sa pagpasihag sa tanang transaksiyon sa simbahan?
***
Bakikaw hisgutan ang kuwentada sa panudlanan sa simbahan. May tigpaminaw gani sa Arangkada sa DYAB Abante Pa, Bisaya! Nga nipasidaan nga ang pagpangayo og kuwentada dakong sala kay nagtimaan nga wa koy salig sa kadagkoan sa simbahan.
Mao tingali ni hinungdan nga bisan ang kadagkoan sa Artsidyosesis sa Sugbo di ganahang mohatag og kuwentada sa kinatibuk-ang kolekta ug gasto. Naghisgot lang sa panalapi aron pagreklamo nga apiki ang panudlanan ug nagkinahanglan ang simbahan og hinabang alang sa dagkong proyekto o kalihokan ug nagbuntaog nga panginahanglan pagpatambal sa retirado nga mga pari.
***
Hangtod karon pulos ra gyod huhungihong ang nadunggan sa katawhan unsa kadako ang kita sa kaparian sa Basilica matag Piyesta Senyor. Usa sa labing karaan mao nga tungod sa kadaghan sa nanimba ug kadako sa kolekta magsud-gawas ang armored vans sa mga bangko aron paghakot sa kuwarta sa pila ka higayon matag adlaw.
Usa sa mga pagtulon-an sa simbahan mao nga di angayng pahibaw-on ang walang kamot sa gihimo sa tuo. Apan makatabang pagpapahuway sa mga pagduda kon ipahibawo sab unsay mga proyekto nga gigastohan, kon duna man.
***
Di hinuon monopoliya sa simbahan ang panagana pagbutyag sa katigayonan. Kay ang labing dagkong opisyal sa kagamhanan hugtanon sang nagdumili pagpahibawo sa ilang kabtangan ug mga utang. Si Presidente Rodrigo Duterte, daghang salamat sa pakigkonsabo ni Ombudsman Samuel Martires, dul-an na sa tuig nga nitago sa iyang statement of assets, liabilities and net worth (SALN).
Bisan ang Sinulog Foundation Inc. (SFI), gawas nga nagpabungulbungol sa awhag sa kuwentada, wa kasubay kinsay nagkawat sa P1.6 milyones gikan sa ilang kaha walo ka tuig nang nilabay.
- Latest
