Kahimsog alang lang sa pipila
Nagkaduol nagkahanap ang pagpatuman sa Universal Health Care Law sugod karong bag-ong tuig. Nagka way klaro ang programa nga nipasalig nga libre ang pag-atiman sa mga doktor, pagpuyo sa ospital, mga tambal ug ubang batakan nga pangalagad medikal sa tanang Pilipinhon, labi na sa labing kabos ug labing nagkinahanglan.
Pito ka buwan human napirmahi ang balaod wa pa mahingpit ang implementing rules and regulations sa Republic Act 11223. Labing dakong babag mao ang pagdumili sa pamunoan ni Presidente Rodrigo Duterte sa paggahin sa gikinahanglang kuwarta sa pagpatuman sa programa.
***
Human nipasigarbo nga sila ang nakapatuman sa labing ambisyusong programa sa kahimsog nga igo rang giplano sa nangaging mga pamunoan, ang nasudnong liderato nihimo og daghan uyamot nga mga lut-od sa pagbudhi sa ilang gipasar nga balaod:
•Inay dugangan, gilaslasan ang budget sa Department of Health nga maoy gitahasan sa labing lisod nga gimbuhaton sa pagpatuman sa programa; ug
•Gihikaw gikan sa programa bisan ang kuwarta nga nakolekta gikan sa sin taxes nga gipasalig alang sa health services ug gani gigamit sa pagpahumot sa Tax Reform for Acceleration and Inclusion (TRAIN) Law.
***
Ang mas salawayong pagbudhi mao nga ang paghikaw sa gikinahanglan nga pundo di tungod sa kanihit sa panudlanan. Kay gipaburot man gani ang nasudnong budget sa 2020 ngadto sa P4.1 trilyones.
Kon dili tungod kay gipasimang ang kuwarta sa laing katuyoan. Sama sa mas dagkong pork barrel, P100 milyones sa matag kongresista ug P200 milyones sa matag senador. Ug mas abundang intelligence funds nga di maapil sa naandang audit ug gikabalak-ang gamiton pagpanggukod sa mga di mosipsip sa administrasyon.
***
Mangandam tang daan sa nasudnong pagkabawo kapin sa duha ka buwan na lang gikan karon. Nikumpisal si Health Secretary Francisco Duque III nga 28 ka lalawigan ug lima ka dakbayan ray makapahimus. Sa ato pa, ang kinabag-an sa katawhan palawayon lang una.
Sa Central Visayas, way apil ang Bohol, Negros Oriental, ug Siquijor. Bugtong gipili mao rang Sugbo. Nga ambot unsa kaandam. Kay inay padayunon ang mga pangalagad medikal nga gipalambo sa pamunoan ni kanhi gobernador Junjun Davide gi-baratilyo man hinuon pinaagi sa pag-outsource sa mga doktor ug ubang mga kawani.
- Latest
