Dakong kakuwang sa nurses

Kon pasyente ka nga nabalibaran og pribadong ospital kay wa na silay bakanteng kuwarto, mahimong usa ka sa wa nila tug-ani sa tinuod. Nahibaw-an ni sa pipila ka pasyente nga nakabantay nga daghan pang bakante nga mga kuwarto ang mga tambalanan nga namalibad.

Kasaligang tinubdan nihunghong namo nga ang tinuod nga hinungdan nganong namalibad sila og mga pasyente mao ang kakuwang sa nurses. Di na manawat ang mga tambalanan og dugang mga pasyente, bisan daghan pa ang bakante nila nga mga kuwarto, kay wa nay nurses nga makaatiman sa mga pasyente.

* * *

Samang tinubdan nibutyag nga labihan kadako sa kakuwang sa nurses nga ang mga tagduma sa pribadong mga tambalanan sa Metro Cebu nigawas na sa Sugbo ug Kabisay-an ug niabot na sa Mindanao sa pagpangita og dugang nurses.

Apan labihan nilang kuganga dihang giingnan sa mga tagduma sa usa sa nursing schools sa Dakbayan sa Cagayan de Oro sa amihanang Mindanao nga naunhan na sila sa mas dagkong mga tambalanan sa Metro Manila.

* * *

Niangkon sa dakong kakuwang sa nurses sa Sugbo ug ubang bahin sa Pilipinas si Dr. Stephen Descallar, presidente sa Philippine Nurses Association (PNA) Cebu Chapter. Ang banabana nila sa PNA nga moabot na og 50,000 ang kakuwang sa nurses karon.

Gibasol ni Decallar ang kagagmay sa suholan. Ang nurses sa pribadong mga ospital nagdawat lang og P9,000 ang buwan, katunga ra sa P18,000 nga minimum nga suholan sa nurses sa mga tambalanan sa gobyerno, labi na sa mga giduma sa Department of Health.

* * *

Nakiglambigit nang kadagkoan sa PNA sa ilang mga katugbang sa Philippine Hospital Association aron nga di na nila babagan ang bag-ong balaudnon nga mopasaka sa minimum nga suholan sa nurses. Gi-anugnan silang Descallar nga napasar na unta sa Senado ug House of Representatives ang unang bersiyon sa balaudnon niadtong 2016 apan gi-veto ni kanhi presidente Noynoy Aquino. Kinsa nipasabot nga kon umintohan ang nurses mabiyaan ang suholan sa ubang medical workers sama sa mga dentista ug optometrists.

Maong namalhin nang nurses sa call centers ug sa mga buhatan sa gobyerno. May natental na ganing mag-polis ug mag-sundawo tungod sa P50,000 nga binuwang suholan.