Kahasol sa Piyesta Senyor
Cellphone jammer man o pawong sa cell sites, angayng mangandam nga way signal ang mobile phones sa duha ka labing dagkong kalihokan sa Piyesta Senyor sunod semana. Bisan nagkasungi ang mga pamahayag sa Police Regional Office-7 ug National Telecommunications Commission (NTC) sa Central Visayas, mapugos ta sa paghimo og alternatibong mga plano unsaon nga makasalmot gihapon sa relihiyuso ug kulturanhong kalihokan.
Daghang salamat sa sayo nga pahibawo. Kay nahatagan ang katawhan og mas taas nga panahon sa pagpangandam. Mas maayo unta kon managsama ang kasayuran sa mga tagduma.
* * *
Unang nipahibawo si PRO-7 Chief Debold Sinas nga dunay signal jammers sa mga ruta sa solemne nga prosesyon sa hapon sa bisperas (Enero 19) ug sa Sinulog Grand Parade sa tibuok adlaw sa piyesta (Enero 20). Matod ni Sinas ang pagtugot na lang sa NTC ang gihuwat sa kapolisan.
Sunod nga nipahibawo si NTC-7 Regional Director Jesus Laureno nga tungod ug alang sa seguridad sa publiko seguro na nga maaprobahan ang awhag sa kapolisan bisan wa pa makaluwat og pormal nga baruganan ang ilang ulohang buhatan.
* * *
Lahi hinuon ang kasayuran nga gihatag ni Laureno: Pawngon nila ang tanang cellphone services agad sa awhag sa Cebu City Police Office (CCPO). Wa siya maghisgot og jammers. Masabot nga ang ilang tugotan mao g’yud ang pagpawong sa cell sites.
Di sab jammers ang gihisgutan ni CCPO Chief Royina Garma. Nipasidaan gani siya nga dunay kahigayonan nga maapektahan ang silingang mga dakbayan sa Mandaue ug Lapu-Lapu ug bisan ang silingang lalawigan sa Bohol.
* * *
Kon sakto si Sinas, mas limitado ang kahasol nga mahiagom sa mga ma-miyesta. Kay ang signal jammers igo rang mopayong sa kadalanan nga maagian sa solemn procession ug sa grand parade. Way labot ang ubang kadalanan sa Dakbayan sa Sugbo ug labi na sa silingang mga dakbayan ug kalungsoran.
Apan kon sakto silang Garma ug Laureno, mas lapad ang kahasol. Kay way cell sites nga para lang sa kadalanan nga maagian sa kalihokan sa Piyesta Senyor. Ni sa Dakbayan sa Sugbo lang. Mao nga bisan pipila ra ka dan ang apil sa piyesta, maduhig ang Toledo, Leyte, Negros, ug ubang mga isla.
- Latest
