Panamilit ni Oscar Tabada
Dayong katug sa mga Sugbuanon niadtong Nobyembre 12, 1990, gipasaligan sila sa Philippine Atmospheric, Geophysical and Astronomical Services Administration (PAGASA) nga ang nagdanga-danga nga kusog nga bagyong Ruping adto moigo sa Guian sa Eastern Samar.
Mao nga labihang kuganga namo nga nangandam na sa pag-sign off sa dyLA AM, ang labing unang sibyaanan nga akong gitrabahoan, nga gitawgan mi og batan-on nga kawani sa PAGASA Mactan nga nanghangyo nga pasidan-an ang mga Sugbuanon nga nisimang si Ruping, wa mosubay sa iyang gitakda nga ruta, ug nagpaingon na sa kinapusoran sa Sugbo.
***
Ang maong kawani moretiro na sa PAGASA karong adlawa. Si PAGASA Visayas Director Oscar Tabada mosanong sa iyang compulsory retirement sa gobyerno dungan sa pagsaulog sa ika-65 nga sumad sa adlawng natawhan.
Daghan uyamot ang katalagman nga gipasidaan sa PAGASA Visayas ubos sa pagduma ni Tabada. Way makatupong sa kamahinungdanon sa iyang pasidaan sa pagsimang ni Ruping. Nga ambot pila ray nakabati kay naluwatan sa lawom na mang gabii. Apan kahadlokan palandungon sa mas daghang mangamatay ug mas dakong kadaot kon di pa tungod sa iyang pangisog.
***
Nagkinahanglan og kaisog ang gihimo ni Tabada kay gisukwahi niya ang opisyal nga forecast sa ulohan nilang buhatan sa PAGASA. Naalarma siya pagkabantay sa kalit nga pagsimang ni Ruping ug nabalaka nga uwahi nang pagpaabot sa sunod nga weather bulletin kay maigo nang Sugbo nga di makapangandam.
Di to maoy una ni kataposang higayon nga gisukwahi Tabada ang ilang ulohang buhatan. Ug kay napamatud-an mang sakto sa matag higayon, wa siya mataktak sa trabaho.
***
Hinunoa, samtang nagkadako ang iyang ranggo nagkabug-at sab ang iyang tingog. Nilampos siya pagkumbinser sa ilang ulohang buhatan sa pagpatuman sa daghan uyamot nga kausaban. Sama sa pagtukod sa Doppler radars ug ubang bag-ong kahimanan sa mas daghan ug mas tukma nga mga dapit sa nasud. Ug sa pag-localize sa weather forecasts nga kaniadto nagsugod ug natapos sa Metro Manila.
Manamilit na si Tabada sa PAGASA. Hinaot nga ang mga nahibilin sama kaisog ug katakos ug kakugihan ug kamapailubon di lang sa pagpasidaan kon dili, ug labaw sa tanan, sa pagpasabot sa panginahanglan sa makanunayon nga pagmatngon sa kamabalhinon sa panahon.
- Latest
