Di paigo ang taktak lang
Sa di pa kahunahuna si Presidente Rodrigo Duterte sa pagtudlo ni Jason Aquino og laing katungdanan human niya taktakon pagka administrador sa National Food Authority (NFA), o sa paghikalimot na lang sa tanang bulilyaso nga iyang gipasiugdahan sa niaging kapin sa duha ka tuig, mangahas mi og sugyot nga suguon ang iyang mga abogado sa pag-andam og mga kaso batok ni Aquino.
Iyawat na lang makabawi sa pagkatumpawak niya sa lang-og nga bahin sa kasaysayan isip labing unang presidente nga maoy nakaingon sa pagkabasiyo sa tanang bodega sa bugas sa gobyerno.
***
Motabang mi og subay sa mga pakauwaw ni Aquino nga mahimong lig-on nga mga sukaranan sa pagkiha niya:
•Ang na-dokumento sa Grains Retailers Confederation (GRECON) sa Sugbo nga pagda sa NFA rice gikan sa Sugbo ngadto sa production area (lalawigan nga may lapad nga basakan) ug gibalik sa Sugbo isip commercial rice apan gisud gihapon sa mga sako sa NFA;
•Ang na-dokumento ni Cabinet Secretary Jun Evasco, sa wa pa taktaka pagka tsirman sa NFA Council, nga ang NFA rice sa Eastern Visayas gipasimang ni Aquino ngadto sa commercial rice traders sa Bulacan nga gipangulohan sa iyang asawa;
***
•Kapakyas niya pagpamalit og mga tipasi gikan sa mga mag-uuma ug sa pagsige niya og pahibawo nga hapit nga mahurot ang NFA rice nga maoy gibasol sa pagpahimus sa mga negosyante pagpaburot sa ilang ginansiya;
•Posibleng paglapas sa General Appropriations Act sa 2017 kay ang P6.2 bilyones nga gahin pagpamalit og mga tipasi gipasimang niya sa pagbayad sa utang sa NFA sa Land Bank of the Philippines (LBP) ug Development Bank of the Philippines (DBP);
•Pagsukwahi sa economic managers ni Presidente Duterte nga nisugo nga ang importasyon itugyan sa pribadong sektor nga mas makapangita sa mas maayong klase ug mas baratong bugas;
***
•Pagpamugos niya sa government-to-government (G2G) importation bisan sa daghang kahigayonan sa pangurakot ug pagsamot og burot sa nagbuntaog nga utang sa NFA; ug
•Bisan sa sugo sa Economic Development Cluster sa gabinete nga ipabaha ang NFA rice sa kamerkadohan aron motidlom ang presyo sa commercial rice, padayong gitanggong ang minilyon ka sakong NFA rice sa ilang mga bodega.
- Latest
