Daghang salamat, Padre
Di nila masuklian ang tanang bugalbugal, di maambasan tanang panginsulto ug pagbinastos ug di matugbangan ang mga hulga ug bangis nga pagkutlo sa mga kinabuhi. Apan di sab mahimo nga magpakahilom, molingiw, motalaw, mangiyugpos ug magpaundayon na lang.
Maong nahukman sa kadagkoan sa Archdiocesan Commission on the Laity (ACL) sa Sugbo nga ang labing maayong paagi sa pagpanalipod sa kaparian ug sa Simbahang Katoliko mao ang pagpahindumom sa tanang hingtungdan sa kadako sa sakripisyo ug sa kamahinungdanon sa tahas sa mga nagpatalinghug sa balaanon nga tawag sa pagsunod ni Kristo.
***
Gipahibawo ni Fe Barino, presidente sa ACL, atol sa iyang pagduaw sa Arangkada sa DYAB Abante Pa, Bisaya! gahapon sa buntag nga gilusad nila ang kalihokang “Salamat, Padre” di lang tungod sa mga pagsuway nga nahiagoman sa simbahan kon dili aron sab sa pagpahaom sa pagdeklarar sa Catholic Bishops Conference of the Philippines (CBCP) sa 2018 nga “Tuig sa mga Pari.”
Gipasabot ni Barino nga di mahimong pasagdan lang sa mga layko ang kaparian nga mao ray managang sa hiningusgan nga mga atake, nga nihulga na sa labing mahinungdanong mga pagtulon-an sa simbahan, gikan sa mga nagtungkawo sa gahom.
***
Sa iyang paglibot sa tanang 168 ka parokya sa tibuok Artsidyosesis sa Sugbo human napili nga presidente sa ACL sa niaging tuig, nakaplagan ni Barino unsa kadako sa gahom sa mga layko kon hatagan og kahigayonan sa pagtampo ug pagduso sa labing mahinungdanon ug dinalian nga mga kawsa.
Malipayon siyang nitaho nga madasigon ang tanang parokya nga magpasiugda sa nagkalainlain nilang kalihokan pagpasidungog ug pagpasalamat sa ilang kaparian karong Dominggo, Agosto 5, nga gideklarar sab nga “Adlaw sa mga Pari sa Parokya.”
***
Nipasalig si Barino nga wa magpakabuta-bungol ang mga layko sa pagpabadlong sa pipila ka pari. Samtang di gawasnon nga mosangyaw sa mga detalye, niingon siya nga seryuso si Cebu Archbishop Jose Palma sa pagdisiplina sa pipila nga nasaag. Nga di angay’ng makatabon sa pagbinuotan sa kadaghanan.
Nisugyot siya nga pasidunggan ang pagka-representante sa mga pari sa Ginoo dinhi sa yuta. Bisan sa tawhanon nilang kahuyangan, daghan uyamot ang kinabuhi nga ilang nahikap. Ug ang mga kalag nga ilang naluwas.
- Latest
