Bugal-bugal sa suholan
Di lang ang nagkalainlaing rehiyon sa Pilipinas ang gitagud-tagod sa regional wage boards pinaagi sa pagtakda og managlahi nga mga suholan. Wa sab nila pasayloa ang nagkalainlaing mga lalawigan, dakbayan, ug kalungsoran nga mga sakop sa samang rehiyon nga ila sang gihiwa-hiwa pinaagi sa pagtakda og nagkalainlain nga mga suholan.
Sama nga ang Metro Manila mosamot pagbuhong kay kanunay'ng makadawat sa kinadak-ang uminto sa inadlaw'ng suholan (P512) ug nga ang Autonomous Region in Muslim Mindanao (ARMM) mosamot ka-iwit kay kinagamyan og uminto (P265), magkadako sang kang-a sa kinadak-an ug kinagamyang mga dapit sa Central Visayas.
***
Kuwestiyonable nang daan ang P20 nga uminto sa minimum nga suholan nga nauyonan sa nagkonsabong mga representante sa gobyerno ug mga negosyante, sinalikway ang mas dakong uminto nga giawhag sa mga representante sa labor, nisamot pa g'yung eskandalo kay di diay makadawat ini ang tanang dapit sa rehiyon.
Ang makadawat sa P20 mao rang mga dapit sa pinalapdan nga Metro Cebu nga mao na karoy nagdawat sa kinatas-an nga inadlaw'ng suholan (P366). P15 ray uminto sa mga isla nga mao'y kinagamyan og inadlaw'ng suholan (P308).
***
Ang mga trabahante sa mosunod ray makapahimus sa bag-ong P386 nga minimum nga suholan: Cebu City, Mandaue City, Lapu-Lapu City, Talisay City, Naga City, Carcar City, Danao City, Cordova, Consolacion, Liloan, Compostela, Minglanilla, ug San Fernando.
Magminghoy sa biya na kaayong P323 nga minimum nga suholan ang mga trabahante sa kalungsoran sa mga isla sa Bantayan ug Camotes sa amihanang Sugbo ug sa atong silingang lalawigan sa Siquijor.
***
Nahimutang sa tungatunga sa kinadak-an ug kinagamyan nga mga dapit sa rehiyon ang mga dapit nga Class B (Toledo City, Bogo City ug tanan nga nahibiling kalungsoran sa Sugbo) ug Class C (Tagbilaran City ug tanang kalungsoran sa Bohol ug ang tanang dakbayan ug kalungsoran sa Negros Oriental).
Haskang lisora nga sabton nganong P386 ang minimum nga suholan sa mga trabahante sa Carcar apan P348 ra ang suholan sa taga-Sibonga bisan usa ra ka dangaw ray nag-uwang nila. Ang mga sakop sa wage board maglisod pagpasabot ining lagda nga manghod lang og diyutay sa binuang nga pagpihig sa mga kulot gikan sa mga tul-id og buhok.
- Latest
