Lupig silang Trillanes
Unsa may nahitabo ni Senador Antonio Trillanes IV? Nganong human gipasanginlang nisakay lang sa kontrobersiya sa P6.4 bilyones nga shabu nga gipayuhot gikan sa China, nga unang giimbestigar sa House of Representatives, human pasanginli nga nagpakauwaw sa Senado ug human pasakai og kaso sa Senate Ethics Committee nga mahimong mosangpot sa iyang pagkasuspenso o pagkataktak sa katungdanan, siya na may hawod?
Nganong human pasanginli nga nagpataka lang napugos man niya si Senador Richard Gordon, tsirman sa Senate Blue Ribbon Committee, sa pag-imbitar sa mga sakop sa pamilya ni Presidente Rodrigo Duterte ug napugos man niya sila sa pagtambong sa imbestigasyon?
***
May sukaranan ang mga pagduda nga si Trillanes igo lang nanagat og mga ebidensiya. Nga gisumpay-sumpay lang niya ang mga ebidensiya aron pagduot ni Presidente Duterte ug sa mga sakop sa iyang pamilya, nga gipasanginlan na niya sa paghupot og ilegal nga katigayonan atol sa kampanya sa niaging piniliay.
Apan ang kaisog ug ka-determinado ni Trillanes sa pagpamugos nga sukitsukiton ang tanang gidudahang nahilambigit sa higanteng kontrabando, bisan unsa pa sila kasikit sa Malakanyang, nakakuha sa suporta sa katawhan.
***
Nga maoy nakapalubay ni Gordon. Nga kon maoy gipabuot hagbay ra untang natangtangan si Trillanes sa hagunghagong. Nga mao say nakaaghat ni Davao City Mayor Sara Duterte sa pagsugyot sa iyang bana nga si Atty. Mans Carpio ug sa iyang manghod nga si Davao City Vice Mayor Paolo Duterte pag-atubang sa Senado.
Bisan ang presidente, kansang katakos sa pagbatyag sa pulso sa katawhan di na malalis, ug bisan sa nag-alintabo niyang kasuko ni Trillanes, napugos sab pag-awhag sa iyang anak ug umagad sa pagtubag sa mga pangutana batok nila.
***
Ug si Trillanes maoy labing andam sa pag-atubang nilang Paolo ug Carpio. Wa siyay napakitang mga ebidensiya nga makapalansang sa duha, apan abunda og kasayuran nga nakapugos ni Paolo pagtago sa iyang bukubuko ug nilang Paolo ug Carpio pagtabon sa ilang bank accounts.
Diin man gikan ang kasayuran ni Trillanes? Mahimong maayo lang gyod siyang maghimu-himo og mga ebidensiya. Apan mahimo sab nga tungod sa talagsaon niyang kaisog si Trillanes ang nahimong batobalani sa tanang kasayuran gikan sa mga nasuhito sa mga tinagoan sa mga Duterte.
- Latest
