Kuwarta sa basura?
“Vietato lamentarsi” (no complaining) reads a sign in Italian hung on the door to Pope Francis’ private rooms in the Vatican that was given to him by a psychologist, according to a religious expert close to the pontiff. AP, File
Kay anaa man ko kanunay sa Cebu City Hall, daghan ang nangutana kanako kabahin niadtong balita nga napublikar sa The FREEMAN niadtong Lunes. Kabahin kadto sa giingong suwat nga gipadala ngadto kang Presidente Duterte ug nagsaysay sa pagpadala dinhi sa Sugbo og basura nga gikan sa South Korea.
Ang nakapakontrobersyal sa maong balita kay giingon nga nalambigit si kanhi konsehal Augustus Pe Jr. sa tinguha unta paglabay og mga basura nga gikan sa Korea diha sa Inayawan Sanitary Landfill. Ang report nagkanayon nga usa ka “Mr. Choi” mao’y nahimamat ni Pe kaniadtong Hulyo 2016 ug mao’y nakigtransaksyon paglabay og mga basura sa Inayawan.
Ambot ngano kaha nga kang Pe man nakigtransaksyon ang maong tawo nga dili na man siya opisyal sa dakbayan. Aw, hinuon dili malalis nga suod g’yud sila si Mayor Osmeña ug si Jun Pe.
Kay suod man kaayo sila si Pe ug Mayor Tomas Osmeña, mao kini ang rason nga daghan ang nagduda nga ang mayor nasayod usab niining mao nga transaksyon. Abtik hinoon kaayo nga nanghimakak sila si Mayor Osmeña ug si Pe sa mao nga pasangil. Ang tinuod, hangtod karon wala g’yud kaayo ko makasabot niining maong isyu.
Wala kaayo ko makahatag og tukmang tubag sa mga nangutana kanako. Apan gituki namo makadiyot ang maong isyu. Dunay miingon nga ang mao nga mga basura, makadaot og mao nga wala kini gitugot nga adto ra ilabay sa Korea.
Misantop sa akong huna-huna ang pangutana kon nganong wala ra man kini gitambog sa dagat gikan sa barko nga gikargahan niini? Ang mga tabi-tabi mao nga ang tag-iya sa mao nga mga basura, nangita og dapit gawas sa Korea nga kalabayan nila niini, ug bahala na kon sila mobayad.
Mao kana ang rason nga daghan kaayo ang naikag nga magpakisayod. Usa ka abogado nga magsisibya sa radyo, mitawag g’yud nako kay apil diay siya nga naikag ug gusto nga magpakisayod niining maong isyu.
Bitaw, kon tuohan nimo ang unod sa maong suwat nga gipadala ngadto sa presidente, makaingon ka nga makakuwarta g’yud si Pe. Unya, si Mayor Osmeña maduhig pa niining mao nga isyu kay magtuo man g’yud ang mga tawo nga nasayod siya ug nagpakahilom lang.
Mao nga kon ako pa mao’y Tommy, paninguhaon nako nga mahibaw-an g’yud ang tinuod. Unya, awhagon nako kadtong nagpadala sa suwat ngadto sa presidente nga mas labing maayo nga mopatim-aw siya aron nga ibulgar kini kon gusto man kaha siya og tinarong.
Ang report mao nga kay napasirad-an na man ang Inayawan Sanitary Landfill tungod sa kamandoan sa Court of Appeals, ang mga basura nga gikan sa barko, gihabwa na lang ug didto gilabay sa usa ka bakante nga luna sa Mandaue. Dunay nangreklamo kay mura’g nangalisbo ug mao nga nabulgar ngadto sa media.
Buyno, kay nabalik na man ang maong mga basura ngadto sa barko ug milawig na man kini pagbalik sa Korea, ang atong paabuton kon unsa’y lakang sa presidente kabahin niadtong suwat nga gipadala sa wala magpaila nga sender.
- Latest
