Kaayohan sa mga polis

Pagkanindot sa gisaad ni Ma’am Candice Gotianuy, ang presidente sa University of Cebu Medical Center (UCMed) nga anaa magbase sa North Reclamation Area sa dakbayan sa Mandaue.

Gitun-an karon niya ang paghatag og benepisyo, sama sa diskwento sa bayranan sa mga polis ug mga anak nila nga ma-admit sa UCMed. Kauban nako si Ma’am Candice nga opisyal sa Cebu Provincial Police Office Advisory Council nga ang tumong mao ang pagtabang sa kapolisan.

Gawas sa UCMed, ang pamilya nila ni Ma’am Candice nanag-iya usab og unibersidad nga mao ang UC, ubos sa pagdumala ni Atty. Gus Go. Nagtabang na usab diay sila sa mga polis nga mitungha sa ilang tunghaan pinaagi sa paghatag og diskwento sa ilang bayranan.

Gipasalig usab ni Ma’am Candice nga makig-coordinate siya sa ubang mga tag-iya og tunghaan sa Sugbo aron nga makahatag usab sila og benepisyo sa mga polis nga mopadayon sa ilang pagtungha sa ilang tunghaan.

Nakadungog ko nga ang University of the Visayas (UV) dugay ra nga nagtabang sa mga kabus. Bisan gani ang mga kawani sa The FREEMAN nga mipadayon pag-eskuyla, gihatagan man og diskwento sa bayranan.

Ingon niini nga matang sa mga adunahang magpapatigayon nga nagdumala og mga ospital ug tunghaan ang angayang sundugon sa uban. Daghan pa kaayong mga benepisyo nga alang sa kapolisan nga gihan-ay pa karon sa CPPO Advisory Council nga gidumala ni Nelson Yuvallos.

Gipasabot man gud ni Yuvallos nga dili kay igo lang nato nga sawayon ang mga polis, kinahanglan usab sila nga tabangan aron madasig pa sa pagtuman sa ilang katungdanan.

* * *

Angay g’yud nga ang kadagkoan sa Cebu City Transportation Office (CCTO) magmugna og ilang grupo nga motrabaho isip clearing team aron paghawan sa mga karsada nga giukopar sa mga tawo nga mapahimuslanon sa higayon.

Kon kining akong sugyot tumanon ni higalang Isko Ouano, ang hepe sa operations branch sa CCTO, mapanglantawan nako nga makatabang kini nga mohapsay ang mga karsada dinhi sa dakbayan sa Sugbo. Karon gud, daghang tawo nga miabuso sa atong mga karsada ug gipasagdan ra.

Mga tawo nga migamit sa karsada para sa kaugalingon nilang interes, sama sa pagbutang og mga tangkal sa manok, pagbutang og mga lamesa nga gigamit isip butangan sa ilang baligya, mga scrap nga puthaw anaa nila diha bungkagon ug ubang abuso nga binuhatan.

Apil sa mga karsada nga giabusohan lang mao ang kabahin sa C. Padilla Street gikan sa eskina Espelita ug Tres de Abril Street paingon sa simbahan sa San Nicolas de Tolentino. Giaspalto sa kagamhanan ang maong karsada, apan wala kini kapahimusli para sa mga sakyanan kay giukopar man kini sa mga tawo.

Walay kalainan sa mga buta ang mga traffic enforcer ug ang mga opisyal sa kagamhanan nga mag-agi-agi diha sa maong dapit kay tabla ra nga wala sila makakita sa maong talan-awon. Mahimo sab nga wala moandar ang ilang utok kon unsay angay’ng buhaton.

Nalipay hinoon ko kay gitawgan ko ni higalang Isko Ouano ug gipasaligan nga tagdon na niya ang mao nga pagpangabuso sa pipila ka tawo, nga miukopar sa karsada.