Pagkanindot kon kahatagan og katumanan kining pangandoy ni Cebu City Vice Mayor Edgardo Labella. Gibutyag ni Labella nga pangandoy g'yud unta niya nga magkahiusa na ang mga politiko dinhi sa Dakbayan sa Sugbo aron nga tulin pa sa manatad ang paglambo sa atong siyudad.
Pagkanindot sa mensahe ni Labella nga iyang giluwatan isip kabahin sa iyang pagyukbo sa sumad sa adlaw sa kaugalingnan, kun Independence Day kagahapon. Tinuod, kon magpadayon ang panagbingkil sa mga politiko, ilabi na ang mga opisyal sa Dakbayan sa Sugbo, makuli kaayo nga maangkon nato ang paspas nga kalamboan sa atong dakbayan.
Apan isip mao'y labing taas nga opisyal sa Team Rama, angay unta nga si Labella mao'y mag-una sa pakighiusa aron matuman ang iyang mga damgo. Si Labella mao'y nangulo sa pagsaulog sa Independence Day dinhi sa Dakbayan sa Sugbo kagahapon nga gihimo atubangan sa Cebu City Hall kay tua man sa laing nasud si Mayor Tomas Osmeña.
Apan wala gani morespeto kaniya ang ubang konsehal nga iyang kaalyado sa Team Rama. Imbes nga tambongan nila ang kalihukan nga gipangulohan sa ilang presiding officer sa konseho, mitambong sila og laing kalihukan.
Masabot kaayo nga ang gipangandoy ni Labella nga kahiusahan sa mga politiko sa dakbayan, moabot ra pinaagi sa iyang paningkamot. Sigurado nga maminaw ni Labella ang ubang kaalyado niya sa grupo. Isip mao'y pangulo sa Cebu City Council, si Labella dako kaayo og mahimo aron mopaspas ang paglambo sa Sugbo.
Apan ang mga politikanhong tigpaniid nakabantay nga ang mga suod nga lumalaban sa Team Rama ug BOPK mao mismo ang dili makadawat nga maghiusa ang duha ka pundok tungod kay may kapahat na man unya sila gahum nga ilang mahuptan.
Dili ikalimod nga may mga alyado sa duha ka politikanhong pundok nga adunay tagsa-tagsa nila ka tinguha, nga dili nila gusto nga mahanaw gikan kanila.
***
Bisan og si Labella sakop sa oposisyon dinhi sa dakbayan, apan gisuportahan niya ang P638 milyones nga tunnel project sa eskina Natalio Bacalso Avenue ug F. Llamas Street sa Barangay Mambaling.
Si Labella nga mao karon ang acting mayor sa dakbayan samtang tua pa sa Netherlands si Mayor Osmeña, miingon nga bisan unsa nga maayong proyekto nga pasiugdahan ug suportahan sa mayor, iya usab nga paluyohan.
Gitataw ni Labella nga ang iyang baruganan mao nga ang politika angay'ng hunongon na inigkahuman g'yud sa eleksyon, ug ang ipatigbabaw mao na ang kaayuhan sa katawhan.
Si Osmeña misuporta g'yud niining maong proyekto pagmugna og tunnel diha sa mao nga dapit sa Mambaling kay makasulbad kini sa problema sa trapiko.
Natan-aw sa Department of Public Works and Highways nga ang pagtukod og flyover project diha sa eskina Natalio Bacalso Avenue ug eskina SRP Access Road wala g'yud makasulbad sa problema sa trapiko.
Kini tungod kay samtang paspas ang pagdagan sa mga sakyanan nga moagi sa flyover paingon unta sa Pardo, ang mga sakyanan mapugos gihapon sa paghunong inig-abot nila sa eskina F. Llamas.
Kon mahuman na ang pagtukod sa tunnel project, ang mga sakyanan nga gikan sa Pardo ug moliko paingon sa F. Llamas ngadto na sa Punta Princesa, dili na magpaabot nga mo-stop ang signal light.