Kapulpol g’yud tawon

Tan-awa, bisan si Mayor Tomas Osmeña nagduda g’yud nga pangwarta kini sa kadagkoan sa Department of Public Works and Highways (DPWH) ang pagpaguba sa mga nindot kaayong karsada aron nga ipakontrata pagbalik, unya ipaaspalto pag-usab.

Aw kining pagduda sa katawhan, kutob ra g’yud sa pagduda kay wala man kita makakita nga nagdawat sila og bahin gikan sa makuwarta sa mga contractor. Apan salawayon kaayo ug maisip nga usa ka pagwaldas sa kuwarta sa kagamhanan kining paggasto sa pagpaaspalto sa karsada nga nindot pa kaayo unta. Kadaghang angayang mao’y unahon diha.

Usa ka opisyal sa DPWH-7 regional office misuway pagpasabot sa usa ka news reporter nga kuno, ang maong karsada nga giguba, tinuod, nindot pa kaayo tan-awon, apan ang ilawom kuno niana guba na.

Pastilan, magkatawa ang makadungog niana nga pagpasabot. Mao kana ang usa ka salingkapaw kaayo nga rason. Ngano man diay og guba na ang ilawom, unya nindot pa ang ibabaw, nasakripisyo ba diay ang pag-agi sa mga motorista?

Ngano nga wala man nila unaha ang mga karsada nga grabe pa kabati? Kun daghan mo og kuwarta diha sa DPWH, kay ang dakong pundo nga para unta sa PDAF sa mga magbabalaod, anaa man gihapak sa inyong ahensya, nangita unta kamo og paagi nga makatabang kamo sa pagpalapad sa mga karsada nga sagad agian sa mga sakyanan.

Kini aron nga kon mapalapdan na, mahimo na nga kamo na ang magdumala kay isipon na man kini nga national road. Pareho nianang Tres de Abril, daghang sakyanan ang mag-again diha, apan kanunay’ng ma-traffic kay hagip-ot kaayo ang maong karsada.

Maglibog man gud kamo kon unsa’y gastohan sa kuwarta nga anaa gipundo sa inyong ahensya mao nga bisan kadtong mga karsada nga nindot pa kaayo, tuyoon lang g’yud sa pagpaguba aron aspaltuhon kini pagbalik.

Dinhi sa Dakbayan sa Sugbo, ngano nga wala man ninyo tiwasa ang pagpalapad ug pagpanindot sa Arellano Boulevard nga anaa mahimutang unahan sa Coast Guard Heaquarters. Kon giayo pa ninyo ang maong karsada, daghan unta nga sakyanan ang moagi diha.

* * *

Lain pa nga reklamo sa katawhan. Ngano nga gitugotan man ninyo ang mga contractor nga inyong gipadaog sa bidding nga kaskason nila ang karsada, apan dugay kaayo nila nga trabahoon?

Nganong dili man nila anam-anamon ang pagkaskas, unya aspaltuhon kadto ra nga mahuman nila nianang adlawa o gabhiona? Wala ba kamo makakita nga ang gikaskas nga karsada sa inyong contractor nakahasol pag-ayo sa mga motorista?

Naunsa gud tawon mo. Mao ba kana ang trabaho sa usa ka engineer? Sagad diha sa DPWH mga engineer, apan wala sila makahuna-huna nga daghan kaayo sila og mga sayop.

* * *

Pabor ko nga pausbawan ang multa alang niadtong makalapas sa ordinansa sa mga siyudad, apil na dinhi sa Dakbayan sa Sugbo.

Giawhag ni Konsehal Joy Pesquera ang Senado ug Kongreso nga himoan nila og kausaban ang Section 458 (a) (1) (iii) nga naglatid nga ang multa nga mapahamtang sa mga ordinansa hangtod lang sa lima ka libo ka pesos, ug himoon kini nga P100,000 aron mahadlok na ang mga abusado.